TÜRKMENISTANYŇ HALK MASLAHATYNYŇ TARYHY MEJLISI: ÝAŞLAR BILEN BEÝIK GELJEGIŇ MÜMKINÇILIKLERI

Ýakynda Türkmenistanyň Magtymguly adyndaky Ýaşlar guramasynyň Arkadag şäheriniň Geňeşiniň guramagynda mukaddes Garaşsyzlygymyzyň 34 ýyllyk toýunyň toýlanylýan günlerinde geçirilen ýurdumyzyň iri syýasy-jemgyýetçilik çäresi bolan Türkmenistanyň Halk Maslahatynyň nobatdaky mejlisiniň dowamynda ýurdumyzyň içeri we daşary syýasaty bilen bagly garalan möhüm wezipeleriň, kabul edilen resminamalaryň ähmiýetini ýaşlara düşündirmek maksady bilen brifing duşuşygy geçirildi. Berdimuhamet Annaýew adyndaky Arkadag şäher mugallymçylyk orta hünär okuw mekdebinde geçirilen duşuşyga bu ýerde bilim alýan bagtyýar talyp ýaşlar gatnaşdylar.

«Döwletliniň başlan işi oň bolar» ady bilen geçirilen duşuşykda Türkmenistanyň Halk Maslahatynyň nobatdaky mejlisine gatnaşyjylar Türkmenistanyň Magtymguly adyndaky Ýaşlar guramasynyň Arkadag şäheriniň Geňeşiniň bölüm müdiri Umyda Kakaýewa, Arkadag şäheriniň 1-nji ýöriteleşdirilen okuw-terbiýeçilik toplumynyň mugallymy Aknur Çaryýewa, Arkadag şäheriniň Daşky gurşawy goramak müdirliginiň suwuň, topragyň hapalanmagyna gözegçilik laboratoriýasynyň müdiri Amangül Arabaliýewa, Döwletmämmet Azady adyndaky Arkadag şäher kitaphanasynyň sanly tehnologiýalar we maglumat howpsuzlygy bölüminiň müdiri Kerim Orazow, Aba Annaýew adyndaky Halkara atçylyk akademiýasynyň talyby Röwşen Şyhberdiýew, şeýle hem Berdimuhamet Annaýew adyndaky Arkadag şäher mugallymçylyk orta hünär okuw mekdebiniň mugallymy Gurbanjemal Sazakowa dagy täsirli çykyş etdiler. Olaryň çykyşlarynda, türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başlyklyk etmeginde geçirilen Halk Maslahatynyň nobatdaky mejlisiniň taryhy ähmiýeti, ýurdumyzyň durmuş-ykdysady ösüşi, Arkadag şäherini ösdürmegiň Konsepsiýasy, aýratyn-da ýaşlar üçin döredilýän mümkinçilikler dogrusynda söhbetler edildi.

Şeýle hem brifing duşuşygynyň dowamynda talyp ýaşlar çykyş edenlerden özlerini gyzyklandyrýan sowallara kanagatlanarly jogaplary aldylar.

Mekan AMANLYÝEW,

Türkmenistanyň Magtymguly adyndaky Ýaşlar guramasynyň

Arkadag şäheriniň Geňeşiniň başlygy.