Ýakynda Türkmenistanyň Magtymguly adyndaky Ýaşlar guramasynyň Ahal welaýatynyň Bäherden etrap Geňeşi bilen etrap bilim bölüminiň bilelikde guramagynda etrapdaky daşary ýurt dillerini çuňlaşdyryp öwredýän ýöriteleşdirilen 30-njy orta mekdebiniň mejlisler jaýynda «Merdana nesil — 2025» atly şadyýan bäsleşiginiň etrap tapgyry geçirildi.
Şadyýan bäsleşigiň etrap tapgyrynyň dowamynda okuwçy oglanlar hormatly Prezidentimiziň parasatly baştutanlygynda Berkarar döwletiň täze eýýamynyň Galkynyşy döwründe amala aşyrylýan uly ösüşleri, bagtyýar çagalygy, dost-doganlygy wasp edýän aýdym-sazly çykyşlary ýerine ýetirdiler, zehin-başarnygyny görkezdiler.
Gyzykly geçen bäsleşigiň etrap tapgyrynyň netijesi boýunça etrapdaky tebigy ugurly dersleri çuňlaşdyryp öwredýän ýöriteleşdirilen 27-nji orta mekdebiniň okuwçysy Umyt Rzagulyýew I orna, H.Çaryýew adyndaky 2-nji orta mekdebiniň okuwçysy Şiri Durdyýew II orna mynasyp boldular hem-de welaýat tapgyryna gatnaşmaga hukuk gazandylar. Ýeňijilere we beýleki gatnaşan okuwçylara Türkmenistanyň Magtymguly adyndaky Ýaşlar guramasynyň Ahal welaýatynyň Bäherden etrap Geňeşi tarapyndan ýadygärlik sowgatlary gowşuryldy.
Rejepnur ATAÝEW,
Türkmenistanyň Magtymguly adyndaky Ýaşlar guramasynyň
Ahal welaýatynyň Bäherden etrap Geňeşiniň başlygy.
