Güneşli Diýarymyzda ilatyň bedenterbiýe we sport bilen meşgullanmagynyň täze milli ulgamy kemala geldi. Bu babatda Gahryman Arkadagymyz, peder ýoluny mynasyp dowam edýän Arkadagly Gahryman Serdarymyz halkymyza nusgalyk mekdebidirler. Sagdyn durmuş ýörelgesi we sport bagtyýar döwürde ösüp gelýän ýaş nesilleri sazlaşykly terbiýelemekde möhüm orun eýeleýär. Şeýle hem, sport bilen meşgullanmagyň medeniýetiniň häzirki zaman jemgyýetimizdäki ornuny ýokarlandyrmak babatda ýurdumyzda düýpli maýa goýumlar goýulýar. Şonuň netijesinde, ýurudumyzyň ähli künjeklerindäki bedenterbiýe we sport edaralarynyň maddy-enjamlaýyn binýady pugtalandyrylyp, döwrebap sport mekdepleridir desgalary yzygiderli gurlup ulanylmaga berilýär. Ýylyň-ýylyna gurulýan saglygy goraýyş merkezleri ilatymyza ýokary derejeli lukmançylyk hyzmatlaryny hödürleýärler we ygtybarly saglygy goraýşy üpjün edýärler. Bu saglygy goraýyş ulgamynyň ösüşleriniň barha belentlere ymtylýandygynyň aýdyň güwäsidir. Türkmen halkynyň Milli Lideri Gahryman Arkadagymyzyň tagallasy bilen işlenip taýýarlanylan «Saglyk» Döwlet maksatnamasynyň yzygiderli durmuşa geçirilmegi netijesinde bu ulgamyň işi dünýä ölçeglerine laýyk getirilýär, ilata edilýän lukmançylyk hyzmatlarynyň görnüşleri giňeldilýär we hili ýokarlandyrylýar. Häzirki wagtda Türkmenistan iri halkara ýaryşlaryň, çempionatlaryň yzygiderli geçirilýän ýurdy bolmak bilen sportuň parahatçylygy, abadançylygy we birek-birege ynanyşmagy öňe sürýän ýörelgelerini bütin dünýäde dabaralandyrýar. Bu babatda Garaşsyz döwletimiz sportuň rowaçlanýan, olimpiýa hereketiniň we halkara hyzmatdaşlygynda parahatçylygyň, hoşniýetliligiň ileri tutulýan ýurdy hökmünde dünýä derejesinde özüni ykrar etdirdi. Geçen ýylyň ahyrynda gözel paýtagtymyzda Kuraş boýunça dünýä çempionatynyň uly ruhubelentlige, ýokary guramaçylyga beslenip geçirilmegi ýurdumyzyň halkara sport abraýyny has hem belende göterdi. Halkara derejeli ýaryşlaryň ýurdumyzda yzygiderli geçirilmegi jemgyýetimizde sport işjeňligini, sagdyn durmuş ýörelgesini ýaýbaňlandyrmaga aýratyn ähmiýet berilýändigine aýdyň güwä geçýär.
Mämmetoraz ORAZBERDIÝEW,
Türkmenistanyň Telekommunikasiýalar
we informatika institutynyň 5-nji ýyl talyby,
TMÝG-niň işjeň agzasy.
