Golaýda Türkmenistanyň Magtymguly adyndaky Ýaşlar guramasynyň Daşoguz welaýatynyň S.Türkmenbaşy etrap Geňeşi etrabyň bilim bölümi bilen bilelikde, 13-nji orta mekdebiň mejlisler jaýynda «Merdana nesil – 2024» atly şadyýan bäsleşigiň etrap tapgyryny geçirdi. Onda merdana nesiller hormatly Prezidentimiz tarapyndan Berkarar döwletiň täze eýýamynyň Galkynyşy döwründe alnyp barylýan tutumly işleri, ata Watanymyzy, eziz Diýarymyzy, bagtyýar çagalygy, dost-doganlygy çeper sözleriň hem-de aýdym-sazly çykyşlaryň üsti bilen wasp etdiler.
Netije-de, 94-nji orta mekdebiň 5-nji synp okuwçysy Mämi Arazow I orna, 77-nji orta mekdebiň 5-nji synp okuwçysy Umyt Durdymädow II orna, 11-nji orta mekdebiň 5-nji synp okuwçysy Polat Arazmamedow III orna mynasyp boldy. Ýeňijiler şadyýan bäsleşigiň welaýat tapgyryna gatnaşmaga hukuk gazandylar. Bäsleşigiň bu tapgyrynda çykyş eden ähli merdana nesillere Ýaşlar guramasynyň ýerli Geňeşiniň Hormat hatlary hem-de ýadygärlik sowgatlary gowşuryldy.
Kuwwat GALPAKOW,
TMÝG-niň Daşoguz welaýatynyň
S.Türkmenbaşy etrap Geňeşiniň başlygy.
