Milli senenamamyzda aýratyn orun alan Halkara Bitaraplyk güni mynasybetli Dänew etrap häkimligi hem-de etrabyň jemgyýetçilik guramalarynyň bilelikde guramagynda aýdym-sazly baýramçylyk çäresi geçirildi. Oňa hormatly il ýaşululary, mährem enelerimiz, syýasy jemgyýetçilik guramalarynyň wekilleri, edara-kärhanalarda zähmet çekýän öňdebaryjy ýaşlar gatnaşdylar.
Etrabyň «Gala» toý mekanynda «Bitaraplyk — tylla täjim» diýen at bilen guralan bu baýramçylyk çäresiniň dowamynda döwletimiziň gün-günden beýgelýän halkara abraýy, hemişelik Bitaraplyk ýörelgelerimiz, ýurdumyzyň daşary syýasy strategiýasynyň üstünlikleri dogrusynda ildeşlerimiziň ýürek buýsançlary diňlenildi. Çykyşlarda şanly ýylymyzda ýurdumyzyň syýasy-jemgyýetçilik durmuşyny bezän guwandyryjy wakalar, gazanylan üstünlikler dogrusynda hem gürrüň edildi. Soňra baýramçylyk dabarasy etrabyň medeniýet-sungat ussatlarynyň, çagalar sungat mekdebiniň okuwçylarynyň joşgunly çykyşlary bilen utgaşdy. Ýerine ýetirilen ajaýyp aýdym-sazly çykyşlar türkmen halkynyň Milli Lideri Gahryman Arkadagymyza, Arkadagly Gahryman Serdarymyza tüýs ýürekden çykýan alkyşlar bolup ýaňlandy.
Maýa BEŞIMOWA,
TMÝG-niň Lebap welaýatynyň Dänew etrap Geňeşiniň
Guramaçylyk bölüminiň esasy hünärmeni.
