Şu günler ýurdumyzyň ähli künjeginde hemişelik Bitaraplyk güni mynasybetli çäreler giň gerime eýe bolýar. Şeýle çäreleriň biri-de düýn Saçly Dursunowa adyndaky Arkadag şäher lukmançylyk orta hünär okuw mekdebinde geçirildi. Türkmenistanyň Magtymguly adyndaky Ýaşlar guramasynyň Arkadag şäheriniň Geňeşiniň guramagynda geçirilen bu baýramçylyk duşuşygy örän şowhunly geçdi. Hemişelik Bitaraplygymyzyň 29 ýyllygyny dabaralandyrmak maksady bilen geçirilen bu çäre «Bitaraplyk – milli buýsanjymyz» diýlip atlandyryldy.
Mukaddes Garaşsyzlygymyzyň, hemişelik Bitaraplygymyzyň beren datly miweleri, aýratyn-da Gahryman Arkadagymyzyň, Arkadagly Gahryman Serdarymyzyň ýolbaşçylygynda ýetilen sepgitler, gazanylan üstünlikler dogrusynda ýerine ýetirilen buýsançly çykyşlar Arkadag şäheriniň Medeniýet müdirliginiň, Sahy Jepbarow adyndaky Arkadag şäher ýörite sungat mekdebiniň ýaş bagşy sazandalarynyň aýdym-sazly çykyşlary bilen utgaşdy. Turuwbaşdan täsirli geçen dabara oňa gatnaşyjylaryň her birinde ýakymly täsirleri galdyrdy.
Mämmedaly ORAZALIÝEW,
TMÝG-niň Arkadag şäheriniň
Geňeşiniň esasy hünärmeni.
