Ýakynda Türkmenistanyň Magtymguly adyndaky Ýaşlar guramasynyň Mary welaýatynyň Baýramaly etrap, şäher hem-de Garagum etrap Geňeşleriniň bilelikde guramagynda döwrümiziň şanyna şan goşjak täze – 2025-nji ýylyň «Halkara parahatçylyk we ynanyşmak ýyly» diýlip atlandyrylmagy mynasybetli «Şanly ýylyň gadamlary» ady bilen aýdym-sazly dabaraly maslahat geçirildi.
Saparmyrat Türkmenbaşy adyndaky Baýramaly şypahanasynyň mejlisler zalynda geçirilen maslahatda çykyş edenler «Halkara parahatçylyk we ynanyşmak ýylynyň» şygary, onuň nyşany, mazmuny barada giňişleýin beýan edip, türkmen halkynyň Milli Lideri Gahryman Arkadagymyzyň «Hakyda göwheri», hormatly Prezidentimiz Arkadagly Gahryman Serdarymyzyň «Magtymguly – dünýäniň akyldary» atly ajaýyp kitaplarynyň many-mazmuny hakynda aýtdylar.
Giň mazmuna eýe bolan maslahatyň dowamynda medeniýet we sungat işgärleriniň ýerine ýetirmeginde ajaýyp aýdym-sazlar diňlendi. Gahryman Arkadagymyzyň, Arkadagly Gahryman Serdarymyzyň alyp barýan beýik işleriniň waspyny ýetirýän aýdym-sazlar maslahata gatnaşyjylara ruhy lezzet paýlady.
Sülgün AGAJANOWA,
Türkmenistanyň Magtymguly adyndaky
Ýaşlar guramasynyň Mary welaýatynyň
Garagum etrap Geňeşiniň başlygy.
