Ýakynda Lebap welaýatynyň Halaç etrabynyň merkezi kitaphanasynda Türkmenistanyň Magtymguly adyndaky Ýaşlar guramasynyň Lebap welaýatynyň Halaç etrap Geňeşiniň gurnamagynda merkezi kitaphananyň agzybir işgärleriniň gatnaşmagynda «Şygryýet äleminiň sönmez çyragy» atly döredijilik duşuşygy geçirildi.
Duşuşygyň dowamynda Merkezi kitaphananyň kitaphanaçysy G.Hudaýberdiýewa, Türkmenistanyň Magtymguly adyndaky Ýaşlar guramasynyň Halaç etrap Geňeşiniň sanly ulgam boýunça esasy hünärmeni Ş.Öwlýagulyýewa dagylar özleriniň çykyşlarynda Gahryman Arkadagymyzyň ýiti zehininden dörän «Hakyda göwheri» atly täze kitabynyň baý many-mazmunyny giňişleýin gürrüň berdiler. Gahryman Arkadagymyzyň ylmy-filosofik eserleriniň watandaşlarymyzyň her biri üçin durmuş we döredijilik şamçyragydygy, halkymyzyň şöhratly taryhyny, baý medeni mirasyny, nusgalyk döwletlilik ýörelgelerini içgin öwrenmekde uly ähmiýete eýedigini uly buýsanç bilen belläp, bu eseriň ýaş nesilleri watançylyk, belent ahlaklylyk, ýokary ynsanperwerlik ruhunda terbiýelemekde gymmatly hazynadygyny nygtadylar.
Duşuşygyň dowamynda Çagalar sungat mekdebiniň ýaş bagşy sazandalary özleriniň aýdym-sazlarynda Gahryman Arkadagymyzy, Arkadagly Gahryman Serdarymyzy hem-de güneşli Diýarymyzy wasp edip çykyş etdiler.
Duşuşygyň ahyrynda Gahryman Arkadagymyzyň ajaýyp eserleriniň höwrüniň köp bolmagyny, janlarynyň sag, ömürleriniň uzak, il-ýurt bähbitli işleriniň elmydama rowaçlyklara beslenmegini arzuw etdiler.
Gandym WELLEKOW,
Türkmenistanyň Magtymguly adyndaky
Ýaşlar guramasynyň Lebap welaýatynyň
Halaç etrap Geňeşiniň baş hünärmeni.
