Ýakynda «Türkmennebit» döwlet konserniniň Balkanabat nebitçilik orta hünär okuw mekdebinde Türkmenistanyň Magtymguly adyndaky Ýaşlar guramasynyň Balkanabat şäher Geňeşiniň gurnamagynda Türkmenistanyň Magtymguly adyndaky Ýaşlar guramasynyň Merkezi Geňeşiniň Gulbaba adyndaky Çagalar baýragynyň ýeňijileriniň arasynda söhbetdeşlik duşuşygy geçirildi.
Söhbetdeşlik duşuşygynda çykyş edenler 2025-nji ýylyň «Halkara parahatçylyk we ynanyşmak ýyly» diýlip yglan edilmegi mynasybetli ýürek buýsançlaryny beýan etdiler. Şowhuna beslenen söhbetdeşlik duşuşygynda bagtyýar çagalaryň ýerine ýetirmeginde ajaýyp aýdymlar belentden ýaňlandy. Gül-gunçaly döwrümizi wasp edýän aýdymlar duşuşyga gatnaşyjylarda ýakymly täsir galdyryp, olara ruhy lezzet paýlady. Çärede çykyş eden Gulbaba baýragynyň ýeňijilerine Türkmenistanyň Magtymguly adyndaky Ýaşlar guramasynyň Balkanabat şäher Geňeşiniň adyndan ýadygärlik sowgatlary gowşuryldy.
Söhbetdeşlik duşuşygynyň ahyrynda çykyş edenler ýaşlaryň bagtyýar durmuşda ýaşamagy, döwrebap bilim almagy üçin uly aladalar edýän Gahryman Arkadagymyzyň, Arkadagly Gahryman Serdarymyzyň janlarynyň sag, il-ýurt bähbitli işleriniň elmydama rowaç bolmagyny arzuw etdiler.
Aýgül IŞANMÄMMEDOWA,
Türkmenistanyň Magtymguly adyndaky
Ýaşlar guramasynyň Balkanabat şäher
Geňeşiniň Guramaçylyk bölüminiň sanly
ulgam boýunça esasy hünärmeni.
