Ýakynda Türkmenabat şäherinde möwsümiň ilkinji tapgyrynda Amyderýanyň kenaryndaky «Bagtyýarlyk» çagalar sagaldyş we dynç alyş merkezine gidýän çagalary ugradyş dabarasy boldy. Onda çykyş eden welaýat, şäher häkimlikleriniň, welaýat baş bilim müdirliginiň, jemgyýetçilik guramalarynyň wekilleri, il sylagly ýaşulular, ata-eneler ýaşlara sapaly tomus paslynda medeniýetli dynç almagy, saglyklaryny berkitmegi arzuwladylar. Soňra çagalar bezelen awtobuslara münüp, ýola düşdiler. Olar ýol ugruna welaýat Taryhy we ülkäni öwreniş muzeýine, welaýat kitaphanasyna, şäherimizdäki taryhy-medeni ýadygärliklere gezelenç etdiler. Täsirli gezelençlerden soňra ýaşlar «Bagtyýarlyk» çagalar sagaldyş we dynç alyş merkeziniň öňündäki meýdança geldiler. Bu ýerde merkeziň bilim işgärleri ýaşlary güler ýüz bilen garşyladylar. Möwsümiň başlanmagy mynasybetli çagalar çeper höwesjeňler toparlarynyň aýdym-sazly çykyşlary guraldy. Şunlukda çagalaryň möwsümiň ilkinji tapgyrynda dynç alşy başlandy.
Möwsümiň dowam edýän günlerinde merkezde çagalaryň gatnaşmaklarynda aýdym-sazly dabaralar, çeper okaýyşlar, sport bäsleşikleri geçiriler. Şonuň ýaly-da şäherimizdäki medeniýet ojaklaryna, tebigatyň gözel künjeklerine gezelençler guralar. Mahlasy, tomusky dynç alyş möwsümi ýaşlara ýatdagalyjy pursatlary bagyşlar.
Dinara KARIMOWA,
Türkmenistanyň Magtymguly adyndaky
Ýaşlar guramasynyň Lebap welaýat Geňeşiniň
guramaçylyk bölüminiň baş hünärmeni.
