Ýakynda Türkmenistanyň Magtymguly adyndaky Ýaşlar guramasynyň Aşgabat şäheriniň Büzmeýin etrap Geňeşiniň, etrap häkimliginiň, Türkmenistanyň Demokratik Partiýasynyň Büzmeýin etrap komitetiniň bilelikde guramagynda “Sport sagdynlygyň, ruhubelentligiň we üstünligiň girewidir” ady bilen Gökderedäki çagalar sagaldyş we dynç alyş merkezinde dynç alýan çagalaryň gatnaşmagynda sportuň birnäçe görnüşleri boýunça bäsleşikler geçirildi.
Gyzgalaňly we çekeleşikli geçen çäräniň dowamynda çagalar öz deň-duşlary bilen özara bäsleşip, zehinlerini, ukyp-başarnyklaryny görkezdiler. Bäsleşige ýeňijilerine we oňa işjeň gatnaşan çagalara gurnaýjylar tarapyndan ýadygärlik sowgatlar gowşuryldy.
Bäsleşigiň ahyrynda oňa gatnaşanlar ýaş nesilleriň mynasyp bilim-terbiýe almagy, ylym öwrenmegi, göwnejaý dynç almagy üçin giň mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň adyna alkyş sözlerini beýan etdiler.
Aýsenem DURDYÝEWA,
Türkmenistanyň Magtymguly adyndaky
Ýaşlar Guramasynyň Aşgabat şäheriniň
Büzmeýin etrap Geňeşiniň Guramaçylyk
bölüminiň sanly ulgam boýunça esasy
hünärmeni.
