Aprel aýynyň 20-28-i aralygynda Russiýanyň Sankt-Peterburg şäherinde 53-nji Halkara Mendeleýew himiýa olimpiadasy geçirildi. Moskwanyň M.Lomonosow adyndaky Döwlet uniwersiteti tarapyndan her ýylda gurnalýan Halkara olimpiada Ukraina, Wengriýa, Rumyniýa, Türkiýe, Gazagystan, Bolgariýa hem-de ilkinji gezek Hytaý, Eýran, Çehiýa, Slowakiýa ýaly ýurtlaryň 29-syndan gelen 150 sany ýaş himikler gatnaşdy.
Ýokary synp mekdep okuwçylarynyň 4-si bäsleşikde Türkmenistana wekilçilik etdiler. Ders bäsleşiginiň jemleri boýunça Daşoguz welaýatynyň Daşoguz şäherindäki iňlis dili, himiýa we biologiýa derslerini çuňlaşdyryp öwredýän 26-njy ýöriteleşdirilen orta mekdebiň okuwçysy Pälwan Jumaýew kümüş medala, Aýratyn zehinli çagalaryň Saparmyrat Türkmenbaşy adyndaky Döwlet mekdep-internatynyň okuwçylary Berdigylyç Rejepbaýew we Atabaý Allamyradow bürünç medallara eýe boldular. Şeýle-de bu mekdebiň 9-njy synp okuwçysy Kerwen Gadamowyň hem üstünlikli çykyş edendigini bellemek gerek.
— Ýaş himikleriň arasynda iň ökdelerini ýüze çykarmak, olaryň ylmy gözleglere bolan höwesini artdyrmak maksady bilen geçirilýän bäsleşik iki nazary we bir amaly-synag — jemi üç tapgyrdan ybarat boldy. Okuwçylar birinji tapgyrda çylşyrymly himiki meseleleri çözmek, 2-nji tapgyrda bolsa tejribehanalarda tejribe işlerini geçirmek boýunça bäsleşdiler. Birnäçe ýyllap yzygiderli Moskwanyň M.Lomonosow adyndaky Döwlet uniwersitetinde geçirilýän ders bäsleşigi bu ýyl Mendeleýewiň periodiki tablisasynyň döredilmeginiň 150 ýyllygy mynasybetli Sankt-Peterburgyň Döwlet uniwersitetinde geçirildi. Ders bäsleşiginiň Dmitriý Mendeleýewiň uçurym bolan, soňra bolsa birnäçe ýyllap zähmet çeken uniwersitetinde geçirilmegi, alyma goýulýan hormatdan nyşandyr. Mundan başga-da Sankt-Peterburgda ýerleşýän Mendeleýew muzeýine, şäheriň taryhy ýerlerine gurnalan gezelençler okuwçylarda uly gyzyklanma döretdi. Ýaşlaryň ylym-bilimli bolup ýetişmekleri üçin döredip berýän giň mümkinçilikleri üçin Gahryman Arkadagymyza köp sagbolsun aýdýarys — diýip, toparyň ýolbaşçysy, Aýratyn zehinli çagalaryň Saparmyrat Türkmenbaşy adyndaky Döwlet mekdep-internatynyň himiýa mugallymy Nazar Mämmedow onuň bilen bolan söhbetdeşligimizde gürrüň berdi.
Ýazgül KAKAGELDIÝEWA,
Halkara ynsanperwer ylymlary we ösüş uniwersitetiniň žurnalistika hünäriniň talyby.
“Nesil” gazeti,
02.05.2019ý.
