«Arkadag» toparynyň futbolçylary AFK-nyň 2-nji Çempionlar ligasynyň çäginde Kataryň «Al-Ahli» topary bilen bolan duşuşykda ýeňlişden sowlup, ikinji ýarymyň goşmaça wagtynyň birinji minudynda 2:2 hasabynda deňligi çekmegi başardylar.
Duşuşyk Dohada «Al-Tumama» stadionynda geçirildi. Duşuşyga FIFA-nyň emini Wiwat Jumpaoonyň ýolbaşçylygyndaky Tailandyň eminler topary hyzmat etdi.
Toparçalaýyn tapgyryň üçünji aýlawynyň şahsy duşuşygyna AFK-nyň 2-nji Çempionlar ligasynyň täze gelenleri «Al-Ahli» we «Arkadag» «B» toparçanyň ýaryş tertibiniň gapdalynda ýerleşip geldiler. Geçen möwsümiň netijeleri boýunça Kataryň Ýyldyzlar ligasynyň (ýokary diwizionyň) 4-nji ýerini eýelän «Al-Ahli» topary öz meýdançasynda Bahreýniň «Al-Haldiýa» topary bilen hem-de myhmançylykda Özbegistanyň «Andijon» topary bilen iki gezek 0:0 hasabynda deňme-deň duşuşygyndan soň 2 utuk gazanypdy. Türkmenistanyň hereket edýän iki gezek çempiony bolsa «Andijon» bilen öz meýdançasynda 0:0 hasabynda deň oýundan we myhmançylykda «Al-Haldiýa» toparyndan 0:2 hasabynda utulanyndan soň 1 utuk gazanypdy.
«Al-Ahli» toparyna 2024-nji ýylyň 7-nji iýunyndan bäri ozal meşhur horwat futbolçysy bolan, 47 ýaşly Igor Bişçan tälim berýär, ol 2005-nji ýylda «Liwerpul» toparynyň düzüminde UEFA Çempionlar ligasyny gazanypdy. Ol duşuşygyň öň ýanyndaky metbugat maslahatynda öz toparynyň Aziýada ähmiýeti boýunça ikinji bolan AFK-nyň 2-nji Çempionlar ligasynyň çäginde ilkinji ýeňşini gazanmaga ukyplydygyna ynam bildirdi.
Birinji ýarymda «Al-Ahli» toparynyň (bu toparyň düzüminde Germaniýanyň ýygyndysynyň düzüminde 2014-nji ýylyň dünýä çempiony we 2017-nji ýylyň konfederasiýalar Kubogynyň ýeňijisi, 32 ýaşly Ýulian Draksler çykyş edýär) agalygy şeýle güýçlüdi welin, AFK-nyň 2024-2025-nji ýyldaky Çagyryş ligasynyň ýeňijisi «Arkadag» topary goragda 45 minut geçirdi we derwezä bir gezek hem urgyny amala aşyryp bilmedi.
Meýdança eýeleriniň basyşy arakesmä dört minut galanda öz miwesini berdi, şonda 28 ýaşly niderlandly ýarymgoragçy Mihel Wlap jerime urgusyny 31 ýaşly horwat Mateý Mitrowiçe ýollady we ol hem kellesi bilen topy çep sütün bilen degirip, aşaky burça saldy.
56-njy minutda Wladimir Baýramowyň şägirtleri meýdança eýeleriniň çep gapdal boýunça eden hüjümine ýol berdiler, ol bolsa M.Wlapyň jerime meýdançasynyň çäginden derwezäniň aşagyndan saklap bolmajak urgusy bilen tamamlandy.
Hasapda 2:0 öňe saýlanan meýdança eýeleri biraz köşeşdiler, duşuşygyň ahyrynda bolsa myhmanlar mundan peýdalandylar. 79-njy minutda üç minut öň meýdança çykan Baýram Ataýew Ýazgylyç Gurbanowyň derwezä urmak synanyşygy şowsuz bolandan soň topy alyp, ýakyn aralykdan hasapdaky tapawudy azaltdy.
Esasy wagta goşulan ilkinji minut başlanda, «Arkadag» topary burç urgusyna hukuk gazandy, ondan soň bolsa Ybraýym Mämmedow kellesi bilen Mekan Saparowy urguly ýagdaýa çykardy, ol hem goragçydan sowlup, ýakyn aralykdan topy derwezä saldy.
«B» toparçanyň beýleki duşuşygynda Özbegistanyň «Andijon» topary ýerli «Bobur Arena» stadionynda 6940 tomaşaçynyň gatnaşmagynda Bahreýniň «Al-Haldiýa» topary bilen 0:0 hasabynda deňme-deň oýnady.
Üç aýlawdan soň bu toparçada «Al-Haldiýa» topary 5 utuk bilen öňde barýar. «Al-Ahli» we «Andijon» toparlarynyň her haýsysynda 3 utuk bar. Ýaryş tertibini 2 utuk bilen «Arkadag» topary jemleýär.
Dördünji aýlawyň jogap duşuşyklary «Arkadag» – «Al-Ahli» we «Al-Haldiýa» – «Andijon» toparlarynyň arasynda 5-nji noýabrda geçiriler.
Beýleki «C» toparçada Türkmenistanyň «Ahal» topary Isfahanda «Nagş-e-Jahan» stadionynda 7200 tomaşaçynyň gatnaşmagynda geçirilen öý duşuşygynda Eýranyň «Sepahan» toparyna 0:1 hasabynda utuldy. Eýranyň wise-çempionynyň düzüminde ýeňiş goly 82-nji minutda Kawe Rezai tarapyndan kellesi bilen urulan urgudan soň derwezeban Kakageldi Berdiýewden gaýdan topy derwezä salmak bilen uruldy.
Bu toparlaryň dördünji aýlawyň çägindäki jogap duşuşygy 4-nji noýabrda Isfahandaky «Nagş-e-Jahan» stadionynda geçiriler.
Ondan öň «Türkmennebitönümleri» Baş müdirligiň topary AFK-nyň 2-nji Çempionlar ligasynyň çäginde Hindistanyň «Mohun Bagan» toparyndan 1:0 hasabynda ýeňiş gazanypdy, emma Hindistanyň çempionynyň oýundan çykarylmagy sebäpli bu netije ýatyryldy.
Şeýlelikde, üç aýlawdan soň «C» toparçada Iordaniýanyň çempiony «Al-Husseýn» topary 6 utuk bilen öňde barýar. «Sepahan» toparynyň 3 utugy bar. «Ahal» toparynyň heniz utugy ýok.
Öň AFK-nyň Kubogy diýlip atlandyrylan AFK-nyň 2-nji Çempionlar ligasynyň häzirki toparçalaýyn tapgyryna 22 ýurtdan 31 topar gatnaşýar, olar geografiki alamatlar boýunça 2 zolaga – Günbatar we Gündogar zolaklaryna bölünendir. 1/8 finala her toparçadan iň gowy iki topar çykar.
turkmenistan.gov.tm
