Türkmenistanyň Magtymguly adyndaky Ýaşlar guramasynyň Daşoguz welaýatynyň Görogly etrap Geňeşiniň gurnamagynda Daşoguz welaýatynyň Görogly etrabynyň daşary ýurt dillerine ýöriteleşdirilen 65-nji orta mekdebinde «Ýaşlar – ata Watanymyzyň gelejegidir» atly şygar astynda ýaşlaryň gatnaşmaklarynda tegelek stoluň başynda söhbetdeşlik çäresi geçirildi.
Türkmenistanyň Magtymguly adyndaky Ýaşlar guramasynyň döredilen güni mynasybetli çäreleri guramak, bu şanly senäni mynasyp belläp geçmek, baýramçylygyň mazmunyny, ähmiýetini ýaşlaryň arasynda wagyz etmek maksady bilen geçirilen tegelek stoluň başyndaky söhbetdeşlik çäresine Türkmenistanyň Magtymguly adyndaky Ýaşlar guramasynyň Daşoguz welaýatynyň Görogly etrap Geňeşiniň jogapkär işgärleri, etrabyň bilim ulgamynda zähmet çekýän ýaşlar gatnaşdylar.
Çäräniň dowamynda Türkmenistanyň Magtymguly adyndaky Ýaşlar guramasynyň Merkezi Geňeşiniň, welaýat, şäher we etrap Geňeşleriniň öňlerinde durýan wezipeler, ýaşlaryň arasynda alnyp barylýan işler, ýaşlara döredilip berilýän mümkinçilikler, Berkarar döwletiň täze eýýamynyň Galkynyşy döwründe ata Watanymyzy ösdürmekde ýaşlara bildirilýän belent ynam, bilimli, zehinli, kämil ýaşlary terbiýeläp, kemala getirmekde öňde goýlan maksatlar dogrusynda giňişleýin söhbetler edildi.
Tegelek stoluň başynda geçirilen söhbetdeşlik çäresine gatnaşanlar, türkmen ýaşlaryna okamaga, öwrenmäge, hünär almaga, döredijilikli zähmet çekmäge giň mümkinçilikleri döredip berýän türkmen halkynyň Milli Lideri Gahryman Arkadagymyza we hormatly Prezidentimiz Arkadagly Gahryman Serdarymyza çäksiz sagbolsunlaryny aýtdylar.
Begenç GARAMURADOW,
Türkmenistanyň Magtymguly adyndaky Ýaşlar guramasynyň
Daşoguz welaýatynyň Görogly etrap Geňeşiniň başlygy.
