Ýurdumyzyň futbol meýdançalarynda Türkmenistanyň Ýokary ligasynyň toparlarynyň arasynda geçýän futbol çempionatynyň 25-nji tapgyrynyň duşuşyklary boldy.
Onuň iň esasy wakasy Büzmeýin etrabyndaky «Sport toplumy» stadionynda geçirilen duşuşykdy, bu ýerde ýurdumyzyň sekiz gezek öňki çempiony «Altyn asyr» 2025/26-njy ýyllaryň AFK-nyň Çempionlar ligasyna gatnaşan «Ahal» toparyny kabul etdi. Iki topar hem şu ýyl kümüş medallar üçin bäsleşýär.
Bäsdeşler bu duşuşykdan öň şu möwsümde üç gezek duşuşdylar. Milli çempionatyň birinji ýarymynda «Altyn asyr» topary iki gezek ýeňiş gazandy: birinji aýlawda ‒ 1:0, ikinji aýlawda ‒ 3:1 hasabynda. «Ahal» toparynyň meýdançasynda geçirilen üçünji aýlawyň duşuşygy bolsa 0:0 hasabynda deňme-deň tamamlandy.
Dördünji duşuşyk eglişiksiz bäsleşikde geçdi. Hasaby «Ahal» toparynyň kapitany Elman Tagaýew 16-njy minutda jerime urgusy bilen açdy. 38-nji minutda Selim Nurmyradow hasaby deňledi ‒ 1:1. Tiz wagtdan Röwşen Halmämmedow 43-nji we 46-njy minutlarda iki gezek gol geçirmek bilen tapawutlandy, netijede «Altyn asyr» topary 3:1 hasabynda öňe saýlandy. 53-nji minutda Nazar Töwekgelow hasaby 2:3-e getirmek bilen, tapawudy ujypsyz etdi. Dokuz minutdan soň bolsa, emin Resul Mämmedow myhman toparynyň oýunçysy Bagtyýar Gürgenowa gyzyl kart görkezdi.
Ýarym sagat töweregi azlykda oýnasa-da, «Ahal» topary ruhdan düşmedi we goşmaça wagtda 3:3 hasabynda deňme-deňligi gazandy. «Türkmennebitönümleri» Baş müdirliginiň toparyny ýeňlişden 91-nji minutda Döwran Hojamämmedow halas etdi.
41 utuk bilen ýaryş tertibinde ikinji orunda barýan «Altyn asyr» topary göni bäsdeşinden üstün çykmak mümkinçiligini elden gideren soň, söbügini basyp gelýän iň ýakyn bäsdeşi «Ahal» toparyndan uzaklaşyp bilmedi. «Ahal» topary ondan bir utuk yza galýar, ýöne onuň heniz oýnalmadyk bir oýny bar.
Bu tapgyrda dördünji orundan ýokary çykmak mümkinçiligini Türkmenbaşynyň «Şagadam» topary-da elden giderdi. Ol, öň habar berlişi ýaly, wagtyndan öň üç gezek Türkmenistanyň çempiony bolan «Arkadag» toparyndan myhmançylykda 0:2 hasabynda ýeňildi.
Ýeňen tarapda Ahmet Ataýew (10-njy minut) we Gurbanmuhammet Esenow (20-nji minut) dagy tapawutlandy.
Bu ýeňlişden soň «Şagadam» bilen «Ahal» toparlarynyň hersiniň 40 utugy bar, ýöne «Şagadam» topary iki oýny köp oýnapdyr.
25-nji tapgyryň beýleki iki duşuşygy myhmanlaryň 2:1 hasabynda ýeňiş gazanmagy bilen tamamlandy. Mary şäherindäki duşuşykda Serdar Gulyýewiň salan iki goly (13-nji we jerimeden 84-nji minutda) netijesinde Balkanabadyň «Nebitçi» topary «Merw» toparyny ýeňdi, onda Abdyresul Abdyýew (19-njy minut) tapawutlandy. Paýtagtymyzdaky duşuşykda bolsa «Aşgabat» topary Tirkişmyrat Sarymyradowyň 36-njy minutda salan golundan soň 1:0 hasabynda öňde barýan «Köpetdag» toparyndan 1:2 hasabynda utuldy. IIM-iň şu duşuşykdan soň iň soňky ornuny terk eden toparyna zoraýakdan ýeňşi goşmaça wagtda iki gol (56 we 90+1) salan Baýramgeldi Gulmaýew getirdi. «Köpetdag» toparynyň utuk sany indi 14 boldy, bu bolsa soňky orna düşen «Merw» toparyndan iki utuk köp.
Iň köp gol salanlaryň arasynda Türkmenistanyň soňky iki çempionatynyň iň ökde «mergeni», «Arkadag» toparynyň oýunçysy Didar Durdyýew 21 gol (1 jerime) öňde barýar. Onuň yzyndan 17 gol (1 jerime) salan topardaşlary Begenç Akmämmedow we 16 gol (1 jerime) salan Altymyrat Annadurdyýew dagy gelýär.
turkmenistan.gov.tm
