«Arkadag» topary ýarym finalyň ilkinji duşuşygynda «Aşgabat» toparyny 3:1 hasabynda ýeňmek bilen, 2025-nji ýylyň futbol boýunça Türkmenistanyň Kubogy ugrundaky ýaryşyň finalyna çykmak islegini aýan etdi.
Duşuşyk paýtagtymyzyň «Nusaý» stadionynda geçirildi.
Ýarym final ýolunda «Arkadag» topary «Nebitçi» toparyny iki gezek - öz meýdançasynda 6:0, myhmançylykda 3:1 hasabynda utdy. «Aşgabat» topary bolsa Türkmenistanyň öňki sekiz gezek çempiony «Altyn asyr» toparyny iki gezek – myhmançylykda 2:1, öz meýdançasynda 3:2 hasabynda utmak bilen, oýundan çykardy.
Ýarym final duşuşygy myhman toparyň artykmaçlygynda geçdi, olardan Ylýas Çaryýew (23-nji minut), Begenç Akmämmedow (42-nji minut) we Diýargylyç Orazow (59-njy minut) dagy gol saldylar. Ýer eýelerinden Begmyrat Pirgulyýew tapawutlandy (38-nji minutda, jerime urgusyndan).
Jogap duşuşygy 18-nji dekabrda Arkadag şäherinde geçiriler, bu topar şu ýyl yzly-yzyna üçünji ýyl Türkmenistanyň çempiony boldy we ikinji gezek ýurdumyzyň Naýbaşy kubogyny gazandy. Indi bolsa ähmiýeti boýunça ikinji milli topar baýragy bolan Türkmenistanyň Kubogy ugrundaky bäsleşikde finala tarap ynamly ädim ätdi.
«Aşgabat» topary bilen geçiren duşuşygy «Arkadag» topary üçin 26-njy noýabrda «Bobur Arenada» geçiriljek AFK-nyň Çempionlar ligasynyň bäşinji tapgyrynda Özbegistanyň «Andijon» toparyna garşy myhmançylykda geçiriljek duşuşygyň öňüsyrasynda gowy güýç synagy boldy. AFK-nyň Çempionlar ligasynyň 2-nji tapgyrynyň şu duşuşygyna çenli, «B» toparçada ýagdaý şeýle: Kataryň «Al Ahli» toparynyň 7 utugy, Bahreýniň «Al Haldiýa» toparynyň bäş oýundan soň 6 utugy, Özbegistanyň «Andijon» toparynyň 4 utugy we Türkmenistanyň «Arkadag» toparynyň dört oýundan soň 3 utugy bar.
«Arkadag» toparynyň «Andijon» topary bilen ilkinji duşuşygy 2025-nji ýylyň 17-nji sentýabrynda Türkmenistanyň çempionynyň stadionynda geçip, 0:0 hasabynda deňme-deň tamamlandy.
turkmenistan.gov.tm
