16-njy aprelde Türkmenistanyň Magtymguly adyndaky Ýaşlar guramasynyň Merkezi Geňeşiniň Türkmenistanyň Dokma senagaty ministrliginiň bilelikde 2019-njy ýylyň «Türkmenistan — rowaçlygyň Watany» diýlip atlandyrylmagy, şeýle hem Türkmen halysynyň güni mynasybetli ýurdumyzyň dokmaçy gyz-gelinleriniň arasynda yglan eden «Bagtyýarlyk döwrüniň ezber gözeli» atly baýramçylyk bäsleşiginiň Aşgabat şäher tapgyry geçirildi. Ýurdumyzyň rowaçlygyna saldamly goşant goşýan dokmaçy ýaşlaryň ata Watanymyza, milli medeni mirasymyza, sungatymyza, däp-dessurlarymyza bolan söýgüsini, türkmen gözellerine mahsus edep-ekramlylyk, mähir-mylakatlylyk, mylaýymlyk häsiýetlerini we işe ezberligini, döredijilik ukybyny, keşp gözelligini açyp görkezmek maksady bilen geçirilen bu bäsleşikde gelin-gyzlar öz aralarynda dört şert boýunça bäsleşdiler. Ussatlyklaryny görkezen çeper elli dokmaçylaryň ählisi üstünlikli çykyş etdiler.
Ýokary ruhubelentlige hem-de şatlyk-şowhuna beslenen bäsleşigiň eminler topary tarapyndan I orna Aşgabat dokma toplumynyň hil barlag bölüminiň işgäri Senemgül Kazakowa, II orna Türkmenbaşy dokma toplumynyň tikinçilik fabriginiň tikinçisi Merjen Arazowa, III orna Türkmenbaşy jins toplumynyň hil barlag bölüminiň hil barlagçysy Ogulşirin Baýramowa, höweslendiriji baýraga bolsa Ruhabat dokma toplumynyň dokma enjamynyň operatory Merjen Meredowa mynasyp görüldi. Bäsleşikde 1-2-nji orunlara mynasyp bolan dokmaçylar bäsleşigiň jemleýji tapgyryna gatnaşmaga hukuk gazandylar.
Ýeňiji bolan we oňa gatnaşan ezber gözelleriň ählisine Aşgabat şäher Ýaşlar guramasynyň Hormat hatlary we gymmat bahaly sowgatlary gowşuryldy.
Gülälek BAÝRAMALYÝEWA,
TMÝG-niň Aşgabat şäher Geňeşiniň baş hünärmeni.
“Nesil” gazeti,
18.04.2019ý.
