Türkmenistanyň harby we hukuk goraýjy edaralarynyň işgärleriniň arasyndaky sportuň görnüşleri boýunça “Türkmenistan - ruhubelentligiň we sagdynlygyň ýurdy” atly X sport ýaryşlarynyň jemleýji ýaryşlaryny geçirmegiň
DÜZGÜNNAMASY
I. Ýaryşyň maksady we wezipeleri:
Berkarar döwletimiziň bagtyýarlyk döwründe ýurdumyzda sporty ösdürmek we ilatyň saglygyny berkitmek, türkmen sportunyň abraýyny dünýä derejesinde ýokary götermek, köpçülikleýin bedenterbiýäni we ýokary derejeli sporty ösdürmek maksady bilen, Türkmenistanyň hukuk goraýjy we harby edaralarynyň işgärleriniň arasyndaky sportuň görnüşleri boýunça geçiriljek “Türkmenistan - ruhubelentligiň we sagdynlygyň ýurdy” atly sport ýaryşlaryny geçirmekden;
Harby we hukuk goraýjy edaralarynyň işgärleriniň arasynda bedenterbiýäni we sporty köpçülikleýin ösdürmekden we giňden ornaşdyrmakdan, sagdyn durmuşy wagyz etmekden;
Harby we hukuk goraýjy edaralarynyň işgärleriniň arasynda ruhubelentligi, päkligi olaryň arasynda dostluk-doganlygy berkitmekden;
Harby we hukuk goraýjy edaralarynyň işgärleriniň arasynda zehinli, güýçli, başarjaň türgenleri saýlap-seçip almak, olaryň Türkmenistanyň ýygyndy toparynyň düzüminde çykyş etmekligini gazanmakdan - ybaratdyr.
II. Ýaryşyň geçirilýän wagty we düzgünleri.
Sport ýaryşlarynyň jemleýji tapgyryna harby we hukuk goraýjy edaralarynyň işgärleriniň ilkinji tapgyrynda sportuň görnüşleri boýunça ýeňiji bolan ýygyndy toparlary gatnaşýarlar.
Sport ýaryşlarynyň jemleýji (final) oýunlary şu Düzgünnama laýyklykda, 2019-njy ýylyň mart-aprel aýlarynda Aşgabat şäherindäki sport toplumlarynda we sport desgalarynda geçirilýär.
Sport ýaryşlarynyň jemleýji ýaryşlaryny guramaçylykly geçirmegiň umumy jogapkärçiligi Türkmenistanyň Sport we ýaşlar syýasaty ministrligine, Türkmenistanyň Demokratik partiýasyna, Türkmenistanyň Kärdeşler arkalaşyklarynyň Milli merkezine, Türkmenistanyň Magtymguly adyndaky Ýaşlar guramasynyň Merkezi Geňeşine, guramaçylyk toparyna we sportuň görnüşleri boýunça eminler toparyna tabşyrylýar.
Tomaşyçylaryň we gatnaşyjylaryň howpsuzlygyny berjaý etmek sportuň görnüşleri boýunça eminler toparyna tabşyrylýar.
III. Sport ýaryşlarynyň görnüşleri we gatnaşýanlaryň düzümi.
Kiçi futbol - (oglanlar) Her toparyň düzümi 10 türgen, 1 tälimçi we 1 emin.
Woleýbol - (oglanlar we gyzlar aýratynlykda) Her toparyň düzümi 12 türgen, 1 tälimçi we 1 emin.
Basketbol - (oglanlar we gyzlar aýratynlykda) Her toparyň düzümi 12 türgen, 1 tälimçi we 1 emin.
Ýeňil atletika - (oglanlar we gyzlar aýratynlykda). Oglanlar: ylgamak - 100m, estafeta- 4 x l00m, uzynlygyna bökmek. Gyzlar: 60m, estafeta- 4x 60m, uzynlygyna bökmek. Her toparyň düzümi 10-adam - 5 oglan we 5 gyz we 1 tälimçi.
Stol tennisi - (oglanlar we gyzlar) Topaiyň düzümi 2 oglan, 1 gyz we 1 tälimçi.
Tennis - (oglanlar we gyzlar) Toparyň düzümi 2 oglan, 1 gyz we 1 tälimçi.
Suwda ýüzmek - 50m, erkin usulda, toparyň düzümi 2 oglan we 1 tälimçi.
Milli göreş - (oglanlar) Her toparyň düzümi 8 pälwan, 1-tälimçi we 1-emin bolup, tutluşyklar 57 kg, 62 kg, 68 kg„ 75 kg, 82 kg, 90 kg, 100 kg., +100 kg agram derejeleri boýunça geçirilýär.
Küşt - Her toparyň düzümi 2 oglan, 1 gyz we 1 tälimçi.
Sambo göreşi - Her toparyň düzümi 9 pälwan, 1 tälimçi we 1 emin bolup, tutluşyklar 52kg, 57kg, 62kg, 68kg, 74kg, 82kg, 90kg, lOOkg, +100 kg agram derejeleri boýunça geçirilýär.
IV. Gatnaşýan guramalar we ýaryşy geçirmekligiň şertleri.
Ýaryşlar sportuň görnüşleri boýunça hereket edýän halkara düzgünnamalaryna laýyklykda geçirilýär.
Jemleýji ýaryşlara hukuk goraýjy we harby edaralaryň işgärleriniň islendik ýaşdaky türgenlerden ybarat ýygyndy toparlary goýberilýär. Ýaryşlara talyplaryň. esgerleriň we işçi gullukçylaryň gatnaşmagyna rugsat berilmeýär.
Eger-de, sportuň görnüşleri boýunça çykyş edýän toparlar ýaryşyň Düzgünnamasyny bozan ýagdaýynda, olaryň ýaryşa gatnaşmak ýa-da gatnaşmazlyk meselesini çözmek Guramaçylyk toparyna tabşyrylýar.
Ýaryşyň dowamynda ýüze çykan mesele boýunça eminler bilen gepleşigi geçirmeklik diňe toparyň wekiline ýa-da ýolbaşçysyna rugsat edilýär.
Ýaryşa gatnaşyjylar özleriniň toparlaryna degişliliginde, birmeňzeş reňkde, san belgisi ýazylan we nyşan çekilen sport egin-eşiginde goýberilýär. Toparyň tälimçileri ýaryş geçirilýän döwründe sport egin-eşiginde bolmalydyr.
V. Ýaryşyň jemlerini jemlemek.
Ýaryşda sportuň hemme görnüşleri boýunça harby we hukuk goraýjy edaralarynyň ýygyndy toparlarynyň çykyşlarynyň netijesini jemläp, iň köp baha toplan topar ýeňiji diýlip yglan edilýär. Ýaryşlar toparlara bölünip geçirilýär. Jemleýji (final) ýaryşda öz toparynda I orun eýelän topar, beýleki II toparda I orny eýelän topar bilen I we II orunlar üçin bäsleşýärler. II orun eýelän toparlar bolsa III we IV orunlar üçin bäsleşýärler we ş.m. Sportuň görnüşleri boýunça ýygyndy topara 1-nji orun üçin 10-bal, 2-nji orun üçin 9-bal, 3-nji orun üçin 8-bal, 4-nji orun üçin 7-bal, 5-nji orun üçin 6-bal, 6-njy orun üçin 5-bal, 7-nji orun üçin - 4 bal, 8-nji orun üçin - 3 bal, 9-njy orun üçin - 2 bal, 10-njy oryn üçin 1 bal bellenilýär.
Ballaryň deň bolan ýagdaýynda toparlaryň 1, 2, 3-nji orunlary köp eýelän toparlaryna artykmaçlyk berilýär.
VI. Ýaryşyň çykdajylaryny we ýeňijilerini sylaglamak.
Ýaryşlara gatnaşmak bilen baglanyşykly çykdajylar: ýol harajaty, iýmitlenmek, myhmanhana ýerleşdirmek hukuk goraýjy we harby edaralaryň hasabyna, ýeňijileri sylaglamak, hormat haty bilen sylaglamak, sport desgalaryň kärende tölegi, eminlere hak tölemek Türkmenistanyň Sport we ýaşlar syýasaty ministrligi, Türkmenistanyň Demokratik partiýasy, Türkmenistanyň Kärdeşler arkalaşyklarynyň Milli merkezi, Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan amala aşyrylýar.
Sport ýaryşlaryň jemleýji tapgyrynyň ýeňijileri bolan toparlar we türgenler (gatnaşyjylar) Türkmenistanyň Prezidentiniň ýörite sowgady, Türkmenistanyň Sport we ýaşlar syýasaty ministrliginiň Hormat hatlary hem-de Türkmenistanyň Demokratik partiýasy, Türkmenistanyň Kärdeşler arkalaşyklarynyň Milli merkezi, Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan Kuboklar we medallar bilen sylaglanýarlar.
VII. Islegnamalary (zaýawka) tabşyrmaklygyň tertibi we möhleti.
Sportuň görnüşleri boýunça jemleýji ýaryşlara gatnaşmak üçin atma-at ýazylan hödürnamalar ýaryşyň başlamaklygyna 1 gün galanda eminler toparyna tabşyrylýar. Türgenler ýaryşyň başlamagyna 30 minut galanda ýerlerinde bolmaly. Ýaryşyň düzgünleriniň bozulmagy bilen baglanşykly ýazylan arza-şikaýatlar ýaryş tamamlanandan soň 2 sagadyň dowamynda eminler topary tarapyndan kabul edilýär. 2 sagatdan gijä galdyrylyp ýazylan arza-şikaýatlar kabul edilmeýär. Kabul edilen arza-şikaýatlara eminler topary 24-sagadyň dowamynda ýazmaça jogap berýär.
Ýaryşa gatnaşýan toparyň jogapkär wekilleri emin agzalaryna:
- sportuň her görnüşi boýunça gatnaşýan toparlaryň hökmany lukmanyň gözegçiliginden geçen, onuň goly we möhri bilen tassyklanan islegnamasy (harby we hukuk goraýjy edaralaryň ýolbaşçylary tarapyndan tassyklanan bolmaly);
Bellik: Sportuň görnüşleri boýunça mandat komissiýa geçirilende harby we hukuk goraýjy edaralaryň jogapkär wekilleri ýaryşlara gatnaşýan her türgeniň şahsyýetnamasyny emin agzalaryna görkezmeli.
Şu düzgünnama geçiriljek ýaryşlara resmi çakylykdyr.
