Hormatly Prezidentimiziň parasatly baştutanlygynda ýaşlara döwrebap bilim bermek, bilim ulgamyny barha kämilleşdirmek esasy ugurlaryň birine öwrüldi. Milli ykdysadyýetimiziň ähli pudaklary bilen birlikde, bilim ulgamy uly ösüşlere beslenýär. Häzirki wagtda ýurdumyzyň ähli sebitlerinde mekdebe çenli bilim edaralarynyň,umumy orta bilim berýän mekdepleriň, orta hünär we ýokary okuw mekdepleriniň işi döwrebap alnyp barylýar, sanly ulgamyň mümkinçilikleri giňden ornaşdyrylýar. Garaşsyz, baky Bitarap Watanymyzyň geljegi bilimli, ylymly, watansöýüji ýaşlara baglydyr. Türkmenistany ösdürmegiň ileri tutulýan ugurlarynyň biri jemgyýetiň ruhy, durmuş ykdysady we medeni ösüşiniň binýady hökmünde bilim ulgamyny hasda kämilleşdirmekden ybaratdyr. Ýurdumyzyň çalt depginlerdäki ösüşinde, ilkinji nobatda, ylmy tehniki ösüşiň gazananlaryndan, täze tehnologiýalardan, innowasiýalardan baş çykarýan hünärmenleri taýýarlamak zerurdyr. Şunda bilimiň ilkinji esaslary çagalar baglaryndan başlanýar. Häzirki wagtda ýurdumyzda mekdebe çenli bilim edaralarynyň işleri döwrüň talabyna laýyklykda kämilleşdirilýär. Bilim ulgamyny ösdürmek ugrunda kämil tehnologiýalar ornaşdyrylýar.
Berkarar döwletiň täze eýýamynyň Galkynyşy döwründe hormatly Prezidentimiz milli bilim ulgamynda oňyn özgertmeleriň üstünlikli durmuşa geçirilmegine möhüm ähmiýet berýär. Şu nukdaýnazardan ýaşlaryň hünär öwrenmegi, ylymly, hünär taýdan kämil bolmaklary ugrunda uly tagallalar edilýär.
Ýurdumyzyň ykdysadyýetiniň dürli pudaklary üçin ýokary bilimli hünärmenleri taýýarlamaga niýetlenen ýokary okuw mekdepleriniň, şeýle hem olarda okadylýan ugurlaryň möhüm ähmiýetlidigini bellemek gerek. «Türkmenistanda sanly bilim ulgamyny ösdürmegiň Konsepsiýasyna» laýyklykda, ýokary okuw mekdeplerinde sanly bilim portaly işlenilip düzüldi. Bilim portalynda ýokary okuw mekdepleriniň bilim terbiýeçilik işlerine dahylly maglumatlar, audio, wideo materiallar, interaktiw multimedia programmalar, ylymda we tehnikada gazanylýan täzelikler ýerleşdirildi. Ýurdumyzyň ýokary okuw mekdepleri daşary ýurtlaryň degişli ýokary okuw mekdepleri bilen internet arkaly uzak aralykdan sapaklary, wideo şekilli maslahatlary guraýar.
Hormatly Prezidentimiz Serdar Berdimuhamedowyň baştutanlygynda ylym bilim ulgamynda alnyp barylýan özgertmäniň çäginde halkara hyzmatdaşlygy işjeň ösdürilýär. Ylmy parklaryň we innowasion meýdançalaryň halkara assosiasiýasynyň (IASP) Baş Assambleýasynyň 39-njy Bütindünýä maslahatynda Türkmenistanyň Ylymlar akademiýasynyň Tehnologiýalar merkeziniň assosiasiýanyň agzalygyna kabul edilmegi hem ylymda, bilimde halkara hyzmatdaşlygyň ýokary derejä eýe bolýandygyny beýan edýär. Munuň özi ýaş alymlary taýýarlamagyň, döwrebap bilim bermegiň esasy ugurlarynyň birine öwrülendigini aňladýar. Şonuň üçin daşary ýurtlaryň bilim edaralary we öňdebaryjy ylmy merkezleri bilen işjeň hyzmatdaşlyk ýola goýulýar.
«Halkyň Arkadagly zamanasy» ýylynda bilim ulgamyny ösdürmek, ýaş nesle berilýän bilimiň hilini ýokarlandyrmak boýunça durmuşa geçirilýän işler halkymyzy buýsandyrýar. Ýaşlarda bilime, ylyma, ata Watana çuňňur söýgini ösdürmek mugallymlaryň baş maksady bolup durýar.Hormatly Prezidentimiz: «Ýaş nesillerimiziň bilimleriň we ylymlaryň esaslaryny, akyl we fiziki zähmet endiklerini özleşdirmekleri, olarda ýokary ahlak sypatlaryny, sagdyn durmuş ýörelgelerini terbiýelemek üçin mugallymlarymyz hemişe döredijilik gözleginde bolmalydyr» diýmek bilen, bilim ulgamynyň öňünde uly wezipeleri goýýar.
Berkarar döwletiň täze eýýamynyň Galkynyşy döwründe ýaş nesilleriň geljegi ugrunda bimöçber alada edýän Arkadagly Serdarymyza köp sagbolsun aýdýarys! Goý, hormatly Prezidentimiziň jany sag, ömri uzak, beýik işleri rowaç bolsun!
Aýna HOJAGELDIÝEWA,
Türkmenistanyň Telekommunikasiýalar we
informatika institutynyň mugallym öwrenijisi
«Mugallymlar» gazeti,
02.11.2022 ý.
