Türkmenistanyň Magtymguly adyndaky Ýaşlar guramasynyň Daşoguz welaýatynyň Akdepe etrap Geňeşi, ýakynda etrabyň 55-nji orta mekdebiniň mejlisler jaýynda orta mekdepleriň Ilkinji Ýaşlar guramalarynyň başlyklarynyň gatnaşmagynda “Ýaşuly nesliň göreldesi – ýaşlara ýörelge” atly wagyz-nesihat çäresini geçirdi. Bu çäre Milli Geňeşiň Halk Maslahatynyň Başlygy Gurbanguly Berdimuhamedowyň başlyklyk etmeginde Gahryman Arkadagymyzyň adyny göterýän Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň ilkinji mejlisinde hormatly Arkadagymyzyň eden taryhy çykyşyny ýaşlaryň arasynda wagyz etmek maksady bilen geçirildi. Çärede Ilkinji Ýaşlar guramalarynyň başlyklarynyň hem-de işjeň agzalarynyň çykyşlary diňlenildi. Çykyşlarda Gahryman Arkadagymyzyň ösüp gelýän ýaş nesilleri watansöýüjilik ruhunda terbiýelemek ugrunda alyp barýan giň möçberli işleri, Howandarlyga mätäç çagalara hemaýat bermek boýunça haýyr-sahawat gaznasy tarapyndan ýurdumyzyň ähli künjeginde durmuşa geçirilen il-ýurt bähbitli sahawatly işler dogrusynda giňişleýin bellenip geçildi.
***
Golaýda Türkmenistanyň Magtymguly adyndaky Ýaşlar guramasynyň Daşoguz welaýatynyň Saparmyrat Türkmenbaşy etrap Geňeşi, etrabyň 94-nji orta mekdebiniň okuwçylarynyň arasynda “Maşgala mukaddesligi – halkymyzyň milli terbiýesiniň gönezligidir” ady bilen wagyz-nesihat çäresini geçirdi. Bu çärä etrabyň Ýaşlar guramasynyň, zenanlar guramasynyň işjeň agzalary, mährem eneler we jemgyýetçilik guramalarynyň wekilleri gatnaşdylar. Duşuşykda çykyş edenler, hormatly Prezidentimiziň Türkmenistanyň Magtymguly adyndaky Ýaşlar guramasynyň VII Gurultaýynda: «Halallyk we maşgala gymmatlyklaryna ygrarlylyk ýaşlaryň baş ýörelgesine öwrülmelidir. Ýaş ynsanda şeýle häsiýetleri terbiýelemek Ýaşlar guramasynyň belent borjy we baş maksady bolmalydyr» diýen ganatly jümlelerini buýsançly belläp geçmek bilen, Arkadagly Serdarymyzyň öňde goýan wezipelerini, şeýle-de, ýaşlary maşgala durmuşyna taýýarlamak, maşgala mukaddesligine söýgi döretmek, at-abraýyny saklamak we goramak barada giňişleýin belläp geçdiler.
***
Ýakynda Türkmenistanyň Magtymguly adyndaky Ýaşlar guramasynyň Daşoguz welaýatynyň Daşoguz şäher Geňeşi ýaşlaryň ugurtapyjylygyny hem-de başarnyk baýlyklaryny kämilleşdirmek maksady bilen, şäheriň 15-nji orta mekdebiniň 5-nji synp okuwçylarynyň arasynda “Muny kim başarar?” atly şadyýan bäsleşigini geçirdi. Bäsleşikde “Garaşsyzlyk”, “Bitaraplyk” we “Galkynyş” toparlary özara bäsleşdiler. Bäsleşik üç şertden: kim çalasyn-kim çakgan, muny diňe men başarýaryn, üm arkaly söhbetdeşlik şertlerinden ybarat boldy. Çekeleşikli geçen bäsleşikde “Bitaraplyk” topary ýeňiji boldy. Ýeňiş gazanan hem-de işjeň gatnaşan okuwçylara TMÝG-niň ýerli Geňeşiniň ýadygärlik sowgatlary gowşuryldy.
***
Türkmenistanyň Magtymguly adyndaky Ýaşlar guramasynyň Daşoguz welaýatynyň Gurbansoltan eje adyndaky etrap Geňeşi, etrabyň 31-nji orta mekdebiniň okuwçylarynyň gatnaşmagynda “Saglyk – ýaşaýşyň gözbaşydyr” atly wagyz-nesihat çäresini geçirdi. Bu çäre ýaşlaryň sagdyn bedenli, arassa ahlakly, watansöýüji, kämil hünärli bolmaklaryny gazanmak, hormatly Prezidentimiziň ýolbaşçylygynda ylym-bilim ulgamynda durmuşa geçirilýän düýpli özgertmeleri wagyz etmek maksady bilen geçirildi. Çärede ýerli jemgyýetçilik guramalarynyň wekilleriniň çykyşlary diňlenildi. Çykyşlarda saglygyň sakasynyň sportdygy, sportuň adamyň durmuşynda wajyp orny tutýandygy, onuň adam bedenine, hususan-da, ösüp gelýän ýaş nesillere peýdaly täsirleri dogrusynda giňişleýin bellenip geçildi.
