2023-nji ýylyň “Arkadag Serdarly bagtyýar ýaşlar ýylynda” Balkanabat şäheriniň orta mekdepleriniň 8-11-nji synplarynda okaýan okuwçylarynyň arasynda ýaşlaryň ähli taraplaýyn ösen, beden we ruhy taýdan sagdyn, bilimli-ylymly bolmagyny gazanmak, ýaşlarda ata-babalarymyzyň müňýyllyklaryň dowamynda kemala getiren mertlik, edermenlik, watansöýüjilik, halallyk, ruhubelentlik, päkýüreklik, arassa ahlaklylyk, zähmetsöýerlik ýaly häsiýetleri terbiýelemek hem-de olarda milli mirasymyza bolan sarpany kemala getirmek, zyýanly endiklerden daşda durmaklaryny gazanmak maksady bilen TMÝG-niň Balkan welaýat Geňeşi, Balkan welaýat Polisiýa müdirligi, Balkan welaýat Baş Bilim müdirligi, TDMG-nyň Balkan welaýat müdirligi bilen bilelikde Balkanabat şäheriniň 1-5-6-7-13-nji mekdeplerinde wagyz-ündewe duşuşygyny geçirdi. Ýurdumyzyň berk binýadyna deňelýän ýaşlar ylym-bilim ulgamynda bahasyna ýetip bolmajak öňegidişlikler gazanýarlar. Olaryň her biri şanly senelerden ýüküni tutan taryh sahypalaryna altyn harplar bilen ýazyldy. Ýurdumyzda ýaşlaryň ylymly-bilimli, giň dünýägaraýyşly, ösen tehnologiýalardan ussatlyk bilen baş çykarýan, watansöýüji, zähmet söýer, milli ruhda terbiýelenen kämil şahsyýetler bolup ýetişmekleri ugrunda giň gerimli işleriň durmuşa geçirilmegi-de, mukaddes Garaşsyzlygymyzyň bize peşgeş beren mizemez gymmatlygydyr. Bilimiň binýady näçe berk bolsa, şol ýurduň geljegi hem şonça röwşen bolýar. Ýurdumyzda gazanylan ähli üstünlikler we ýetilen belent sepgitler ylym-bilimiň, ösen aňyýetiň miweleridir. Häzirki döwürde ýurdumyzy ösdürmegiň döwrebap nusgasy täze mazmun bilen baýlaşdyrylyp, ylym-bilim ulgamyny kämil derejelere ýetirmek wezipesi döwlet syýasatynyň ileri tutulýan ugurlarynyň birine öwrüldi. Bu wezipeleri üstünlikli durmuşa geçirmekde beýik işler amala aşyrylýar. Ösüp gelýän ýaş nesillere okamaga, döretmäge, halal zähmet çekmäge giň mümkinçilikleri döredip berýän Türkmen halkynyň Milli Lideri Gahryman Arkadagymyza Arkadagly Serdarymyza alkyş sözleri aýdyldy.
Ennebike ANNAGELDIÝEWA,
TMÝG-niň Balkan welaýat Geňeşiniň
Guramaçylyk bölüminiň sanly ulgam
boýunça esasy hünärmeni.
