Hormatly Prezidentimiziň ýurdumyzda sporty we bedenterbiýäni ösdürmek baradaky alyp barýan syýasatyny durmuşa ornaşdyrmak, türgenleri watansöýüjilik ruhunda terbiýelemek, Berkarar döwletiň täze eýýamynyň Galkynyşy döwründe ýurdumyzyň türgenleriniň halkara ýaryşlarynda baýrakly orunlara mynasyp bolmaklaryny gazanmak, sport toparlaryny, amala aşyrylýan her bir başlangyçlarda Milli Liderimiz Gahryman Arkadagymyz tarapyndan başy başlanyp, Arkadagly Serdarymyz tarapyndan mynasyp dowam etdirilýän halkymyzyň, aýratyn-da ýaş nesillerimiziň asuda, abadan parahat durmuşda ýaşamagy baradaky belent maksatlary durýar. Hormatly Prezidentimiziň “Men ýurdumyzyň ýaşlarynyň ene-ata we il-ýurt öňündäki mukaddes borjuny berjaý edip, mynasyp adamlar bolup ýetişjekdiklerine, ata Watanymyzyň gülläp ösmegi ugranda jan aýaman zähmet çekjekdiklerine pugta ynanýaryn” diýen ajaýyp sözlerini belent wezipe edinip, Türkmenistanyň Magtymguly adyndaky Ýaşlar guramasynyň Balkan welaýatynyň Türkmenbaşy şäher Geňeşiniň, Balkan welaýatynyň Türkmenbaşy şäher Bilim bölüminiň, Balkan welaýatynyň Türkmenbaşy şäheriniň Bedenterbiýe we Sport bölüminiň, “Dana” bilim merkeziniň bilelikde gurnamagynda Türkmenbaşy şäherindäki Salkyn Kenar seýilgähinde, Berkarar döwletiň täze eýýamynyň Galkynyşy döwrüniň mekdep okuwçylarynyň ruhubelentliligini, buýsançlylygyny, bedenterbiýe we sporty köpçülikleýin ösdürmek we giňden ornaşdyrmak, sagdyn durmuşy wagyz etmek maksady bilen, Türkmenbaşy şäheriniň orta mekdep okuwçylarynyň arasynda “Sagdyn bedende, sagdyn ruh – 2023” atly sport bäsleşigi geçirildi.
Bäsleşik sportuň stol tennisi we küşt görnüşleri boýunça geçirildi. Sportuň stol tennisi görnüşi boýunça geçirilen bäsleşikde her toparda üç okuwçydan we bir tälimçiden ybarat boldy. Stol tennisi boýunça bäsleşik çekeleşikli hem-de örän gyzykly geçirildi. We mundan başga-da sportuň küşt görnüşi boýunça bäsleşik hem örän gyzgalaňly ýagdaýda geçirildi.
Bäsleşigiň dowamynda Türkmenbaşy şäherindäki çagalar sungat mekdebiniň okuwçylary çykyş edip, olar çykyşlarynda türkmen sportunyň waspyny aýdymdyr-sazlaryň we tanslaryň üsti bilen beýan etdiler.
Bäsleşigiň dowamynda bäsleşigiň netijesi boýunça aýratyn tapawutlanan hem-de ýeňiji bolan toparlar Hormat hatlary hem-de Türkmenistanyň Magtymguly adyndaky Ýaşlar guramasynyň Balkan welaýatynyň Türkmenbaşy şäher Geňeşi tarapyndan ýadygärlik sowgatlary bilen sylaglandylar. Bäsleşigiň ahyrynda çärä gatnaşyjylar ýaş nesillerimize giň gerimli mümkinçilikleri döredip berýän Türkmen halkynyň Milli Lideri Gahryman Arkadagymyzyň, Arkadagly Serdarymyzyň janlarynyň sag, ömürleriniň uzak bolmagyny, alyp barýan işleriniň mundan beýläk hem rowaçlyklara beslenmegini tüýs ýürekden arzuw etdiler.
Maýagül GARAJAÝEWA,
TMÝG-niň Türkmenbaşy şäher
Geňeşiniň Guramaçylyk bölüminiň
sanly ulgam boýunça esasy hünärmeni.
