Şu günler Kaka etrabynyň Hywaabat jülgesindäki «Ýaşyl ýaýla» çagalar dynç alyş-sagaldyş merkezinde wagtyny manyly geçirýän ýaşlaryň arasynda dürli bäsleşikler geçirilýär. Merkezde meýilnama esasynda sport ýaryşlary hem guralyp, olara çagalar höwes bilen gatnaşýar. «Sagdyn bedende — sagdyn ruh» ady bilen sportuň woleýbol, futbol görnüşleri boýunça geçirilen ýaryş hem munuň subutnamasydyr.
Ýaryşy Türkmenistanyň Kärdeşler arkalaşyklarynyň etrap birleşmesi, Türkmenistanyň Magtymguly adyndaky Ýaşlar guramasynyň etrap Geňeşi bilelikde gurady. Oňa toparlaryň birnäçesi gatnaşyp, öz aralarynda bäsleşdi. Çagalaryň sport ussatlygy duşuşyklaryň her birinde turuwbaşdan duýuldy.
Ýaş nesli köpçülikleýin bedenterbiýe we sport-sagaldyş hereketlerine çekmek, güýçli toparlary ýüze çykarmak we höweslendirmek maksady bilen geçirilen ýaryşyň netijesinde «Abiwerd» topary umumy hasapda toparlaýyn üstün çykdy. «Gala» topary ikinji, «Galkan» topary üçünji orny eýeledi. Ýeňijilere ýörite sowgatlar gowşuryldy.
Meýlismyrat MYRADOW,
Türkmenistanyň Kärdeşler arkalaşyklarynyň
Kaka etrap birleşmesiniň başlygy.
