Her ýylda BMG-niň Halkara güni 20-26-njy oktýabr aralygynda geçirilýän Birleşen Milletler Guramasynyň hepdeliginiň çäklerinde bolup geçýär. Onda dürli duşuşyklar, söhbetdeşlikler, maslahatlar giňden ýaýbaňlandyrylýar. Şeýle söhbetdeşlikleriň biri Magtymguly adyndaky Türkmen döwlet uniwersitetinde «Medeni miras: geçmişden geljege» ÝUNESKO kafedrasynda Birleşen Milletler Guramasynyň gününe bagyşlanyp geçirildi. Bu söhbetdeşlige ÝUNESKO kafedrasynyň işjeň agzalary, mugallymlar we talyplar gatnaşdylar. Söhbetdeşlikde Berkarar döwletiň täze eýýamynyň Galkynyşy döwründe Hormatly Prezidentimiziň baştutanlygynda hemişelik Bitaraplyk hukuk ýagdaýyna, parahatçylyk söýüjilik, hoşniýetli goňşuçylyk, özara hormat goýmak we deňhukukly netijeli hyzmatdaşlyk ýörelgelerine esaslanýan daşary syýasy ugry yzygiderli durmuşa geçirilýändigi bellenildi. BMG-niň Halkara güni 1947-nji ýylyň oktýabr aýynda Birleşen Milletler Guramasynyň Tertipnamasynyň kabul edilmeginiň iki ýyllygy mynasybetli guramanyň Baş Assambleýasynyň kabul eden Rezolýusiýasynyň esasynda bellenilýär. Ýurdumyzyň BMG-niň Baş Assambleýasynyň Kararnamalarynda berkidilen parahatçylyk döredijilikli möhüm başlangyçlaryň, şol sanda 2023-nji ýyly «Parahatçylygyň kepili hökmünde dialogyň halkara ýyly» diýip yglan etmek baradaky başlangyjyň awtory bolup durýandygy barada maslahatda aýdyldy. Söhbetdeşligiň dowamynda hormatly Prezidentimiz Serdar Berdimuhamedow BMG-niň belent münberinden çykyş edip, ýurdumyzyň möhüm sebit we ählumumy meselelere degişli, şol sanda parahatçylygy, howpsuzlygy üpjün etmek, ykdysadyýet, ulag, energetika, ekologiýa, azyk howpsuzlygy babatda ileri tutulýan garaýyşlary beýan edildi hem-de olary çözmäge gönükdirilen anyk başlangyçlarynyň öňe sürülendigi babatynda bellenildi. Magtymguly adyndaky Türkmen döwlet uniwersitetindäki «Medeni miras: geçmişden geljege» ÝUNESKO kafedrasy tarapyndan gurnalan söhbetdeşlik uly gyzyklanma eýe boldy.
Bike DIWANGULYÝEWA,
Magtymguly adyndaky Türkmen döwlet uniwersitetiniň
ÝUNESKO kafedrasynyň müdiri.
