Duşenbe güni ÝUNESKO-nyň ştab-kwartirasynda guramanyň agza-döwletleriniň ÝUNESKO-nyň işleri baradaky Milli toparlarynyň 10-njy sebitara mejlisi geçirildi. Oňa Türkmenistanyň ÝUNESKO-nyň işleri baradaky Milli toparynyň Jogapkär sekretary Çynar Rüstemowa hem gatnaşdy. Bu barada Türkmenistanyň Fransiýa Respublikasyndaky ilçihanasy habar berýär.
ÝUNESKO-nyň Baş maslahatynyň 42-nji sessiýasynyň çäginde geçirilen mejlise guramanyň ýolbaşçylary we wekilleri, ÝUNESKO-nyň işleri baradaky Milli toparlarynyň Jogapkär sekretarlary gatnaşdy.
Duşuşygyň dowamynda gün tertibindäki möhüm meseleleri, şol sanda hasabatlara syn bermegi, ikitaraplaýyn we köptaraplaýyn başlangyçlary seljermegi, sebit gurluşlary bilen ÝUNESKO-nyň işleri baradaky Milli toparlarynyň arasynda özara gatnaşyk tejribesini kämilleşdirmegi ara alyp maslahatlaşmak meselesine aýratyn üns berildi.
Bu sebitara mejlis ÝUNESKO-nyň işleri baradaky Milli toparlarynyň 2022-2029 ýyllar üçin orta möhletli strategiýasynyň we 2026-2029-njy ýyllar üçin býujetiniň durmuşa geçirilmegine goşant goşmaga, guramanyň maksatnamalaryny durmuşa geçirmekde we strategiki özgertmelerde Milli toparlaryň orny barada pikir alyşmak üçin platforma bilen üpjün etmäge berk ygrarlylygyny görkezdi.
orient.tm
