Hormatly Prezidentimiziň amala aşyrýan beýik işleriniň netijesinde gözel paýtagtymyz Aşgabadyň keşbi barha gözelleşýär, ýaşamak, işlemek we dynç almak, jahankeşdelik üçin amatly şähere öwrülýär. Paýtagtymyzda ýokary halkara ülňülerine doly laýyk gelýän «Aşgabat», «Bagtyýarlyk», «Ylham», Arkadag seýilgähleriniň gözel durky bu ugurda alnyp barylýan işleriň netijeli häsiýete eýe bolýandygynyň aýdyň subutnamasydyr. Seýilgähler paýtagtymyzyň binagärlik toplumyna sazlaşykly utgaşmak bilen, ýurdumyzyň baş şäheriniň binagärligine aýratyn öwüşgin çaýýar. Ak mermerli binalary, giň şaýollary, ýaşyl seýilgähleri, seýilbaglary, köpsanly täsin suw çüwdürimleri bilen Aşgabat köpleriň ünsüni özüne çekýär. Bu görkana seýilgähler adamlaryň amatly dynç almagyna, wagtyny gyzykly geçirmegine, töweregi gurşap alýan gözellikden lezzet almagyna ýardam edýär. Ýaşyl zolaklar ulgamynyň döredilmegi adamlaryň beden we ruhy taýdan sagdynlygyny üpjün etmekde möhüm ähmiýete eýedir. Owadan tebigat adama ruhy lezzet berýär, ýakymly duýgulary oýarýar we özüňi rahat duýmaga, dynç almaga ýardam berýär. Tebigat bilen sazlaşykly ýaşan ata-babalarymyzyň ruhy dünýäsi we paýhasy daş-töweregimizi gurşap alan gözelligi duýmaga mümkinçilik berýär. Bary-ýogy birnäçe ýylyň dowamynda paýtagtymyzyň we onuň töwerekleriniň keşbi tanalmaz derejede özgerdi. Ýurdumyzyň demirgazygyndan günortasyna, gündogaryndan günbataryna uzaýan awtoulag we demir ýollarynyň boýunda hem-de beýleki ýerlerde tokaý zolaklary döredildi. Aşgabadyň gür baglygy, binagärlik keşbi halkymyzyň agzybirligini we jebisligini hem-de röwşen geljege tarap okgunly hereketini alamatlandyrýar. Ýaşyl zolaklar, seýilgähler, gülzarlyklar baş şäherimiziň we onuň ýaşaýjylarynyň açyk kalbyny, myhmansöýerligini beýan edýär. Geçen sanlyja ýyllarda paýtagtymyzyň ähli künjekleri we onuň töwerekleri tanalmaz derejede özgerdi we gülläp ösýän şäher gurşawyna öwrüldi. Tutuş ýurdumyzy, gözel paýtagtymyz Aşgabady beýik ösüşlere besleýän Arkadagly Gahryman Serdarymyzyň, Gahryman Arkadagymyzyň il-ýurt bähbitli işlerinde hemişe üstünlikleriň ýaran bolmagyny arzuw edýäris.
Merdan ORAZOW,
TMÝG-niň Aşgabat şäher
Geňeşiniň başlygynyň orunbasary.
«Aşgabat» gazeti.
11.01.2024 ý.
