Geçmişden – geljege nurly şamçyrag,
Magtymguly Pyragynyň sözleri.
Döwürleň synagyn süýşüren gyra,
Magtymguly Pyragynyň sözleri.
Hatarly ýollaryň aýlawlaryny,
Ýangynly ýürekleň alawlaryny,
Çarkandakly ýollaň ganawlaryny
Açýar bize Pyragynyň sözleri.
Deňiz kenaryna urulýan tolkun,
Dag başyndan inen şemally şowhun,
Hemişe al-ýaşyl atýandyr owsun,
Magtymguly Pyragynyň sözleri.
Türkmeniň tuwagy hem hany-many,
Bogup berdi sözden ajap bossany,
Köňülleriň bir ajaýyp dessany,
Magtymguly Pyragynyň sözleri.
Her ynsana paýlap gujur hem gaýrat,
Döreden dünýäňiz mukaddes sungat.
Geljek nesillere baky dowamat,
Magtymguly Pyragynyň sözleri.
Çeper NAZARGYLYJOWA,
Döwletmämmet Azady adyndaky TMDDI-niň rus dili we edebiýaty fakultetiniň talyby, Türkmenistanyň Ýaşlar baýragynyň eýesi.
