Berkarar döwletiň täze eýýamynyň Galkynyşy döwründe batly gadamlar bilen şöhratly geljege barýan ýurdumyzyň mähriban gelin-gyzlary ykdysadyýetde, syýasatda, medeniýetde, saglyk, ylym-bilim ulgamlarynda joşgunly we tutanýerli zähmet çekip, Watanymyzyň gülläp ösmegine özleriniň mynasyp goşantlaryny goşýarlar.
Ýaňy-ýakynda «Pähim-paýhas ummany Magtymguly Pyragy» ýylynda uludan bellenip geçilýän Halkara Zenanlar güni mynasybetli Türkmenistanyň Magtymguly adyndaky Ýaşlar guramasynyň Aşgabat şäher Geňeşi we Aşgabat şäher Baş bilim müdirligi bilen bilelikde paýtagtymyzyň orta mekdepleriniň 9 – 11-nji synplarynda bilim alýan okuwçy gyzlaryň arasynda yglan edilen «Zeminiň zynaty türkmen gyzlary!» atly şadyýan bäsleşiginiň Berkararlyk etrap tapgyry Aşgabat şäheriniň daşary ýurt dillerine ýöriteleşdirilen 133-nji orta mekdebiniň mejlisler jaýynda geçirildi. Bäsleşikde 1-nji orna Aşgabat şäheriniň 24-nji orta mekdebiniň 10-njy synp okuwçysy Babaýewa Gülnabat, 2-nji orna Aşgabat şäheriniň daşary ýurt dillerine ýöriteleşdirilen 134-nji orta mekdebiniň 10-njy synp okuwçysy Annaýewa Şirin, 3-nji orna Aşgabat şäheriniň daşary ýurt dillerine ýöriteleşdirilen 134-nji orta mekdebiniň 10-njy synp okuwçysy Şiralyýewa Medine, Aşgabat şäheriniň takyk we iňlis dili derslerini öwredýän ýöriteleşdirilen 69-njy orta mekdebiniň 11-nji synp okuwçysy Öwezdurdyýewa Mahym dagylar mynasyp boldular. Bäsleşige gatnaşan okuwçy gyzlary TMÝG-niň Aşgabat şäheriniň Berkararlyk etrap Geňeşi tarapyndan Hormat haty we ýadygärlik sowgatlar bilen sylagladylar.
Gulaýym AŞYROWA,
TMÝG-nyň Aşgabat şäheriniň Berkararlyk etrap Geňeşiniň
Guramaçylyk bölüminiň esasy hünärmeni.
