Golaýda Türkmenistanyň Magtymguly adyndaky Ýaşlar guramasynyň Balkan welaýatynyň Esenguly etrap Geňeşiniň etrap bilim bölümi, etrap bedenterbiýe we sport bölümi bilen bilelikde gurnamaklarynda umumybilim berýän orta mekdepleriň okuwçy gyzlarynyň arasynda sportuň woleýbol görnüşi boýunça ýaryş geçirildi. Hormatly Prezidentimiziň ýurdumyzda sporty, ylmy, bilimi ösdürmek baradaky alyp barýan dünýä nusgalyk syýasatyny durmuşa ornaşdyrmak, ýaşlarymyzy watansöýüji edip terbiýelemek, Berkarar döwletiň täze eýýamynyň Galkynyşy döwründe ýurdumyzyň ýaşlarynyň halkara sport bäsleşiklerinde baýrakly orunlara mynasyp bolmaklaryny gazanmak, sporta bolan söýgüni ösdürmek ugrunda giň gerimli işler durmuşa geçirilýär. Şeýle edilýän aladalara jogap edip Esenguly etrabynyň sport mekdebinde geçen ýaryşda orta mekdep okuwçy gyzlary özleriniň sporta bolan höweslerini, ukyplaryny, başarnyklaryny doly ýüze çykardylar. Ýaryşda 1-nji orna 9-njy orta mekdebiň, 2-nji orna 10-njy orta mekdebiň, 3-nji orna bolsa 5-nji orta mekdebiň gyzlar topary mynasyp boldular. Bäsleşikde ýeňiji bolan toparlara TMÝG-niň Balkan welaýatynyň Esenguly etrap Geňeşiniň gymmat bahaly sowgatlary we Hormat hatlary gowşuryldy.
Bagtyýar ýaşlarymyza sport bilen meşgullanmak üçin giň mümkinçilikleri döredip berýän, her bir işde görelde mekdebi bolýan Gahryman Arkadagymyza, Arkadagly Gahryman Serdarymyza çäksiz hoşallyk bildirýäris.
Tagandurdy TAGANDURDYÝEW,
TMÝG-niň Balkan welaýatynyň
Esenguly etrap Geňeşiniň başlygy.
