Ornuň bardyr mynasyp göwünleriň töründe,
Pähim-paýhas ummany Magtymguly Pyragy.
Dogry ýol, ýagty geljek şygyrlaryň barynda,
Pähim-paýhas ummany Magtymguly Pyragy.
Bu gün şygyr mirasyň adamzadyň baýlygy,
Halklaryň ykrary – beýiklige taýdygy,
Şygra ýugrulan ömrüň Hakdan halka paýdygy,
Pähim-paýhas ummany Magtymguly Pyragy.
Sygnyp togap etmäge edep bardyr nusgalyk,
Çökgün göwne ganatdyr, gaýyp ruhy hassalyk,
Ündewiň mydam mertlik, rehimdarlyk, pespällik,
Pähim-paýhas ummany Magtymguly Pyragy.
Dana keşbiňe hormat entegem bärden belkem,
Setirleň dillerde sena, aýdyň ýollara ýalkym,
Bu gün müň gez beýgeltdiň mertebesin öz halkyň
Pähim-paýhas ummany Magtymguly Pyragy.
Nurtäç ANNAMUHAMMEDOWA,
"Garagum" žurnalynyň jogapkär kätibi.
