Golaýda Görogly etrabynyň Medeniýet öýünde etrap çagalar sungat mekdebiniň 2023-2024-nji okuw ýyly mynasybetli hasabat konserti geçirildi. Konserte ata-eneler bilen birlikde höwes bildiren ýaşlar uly ruhubelentlikde gatnaşdylar.
Hasabat konserti bilen çykyş eden ýaşlar sungat äleminde özleriniň mynasyp orunlaryny tapmak üçin höwesleriniň çäksizdigini, zehin taýdan mümkinçilikleriniň giňdigini beýan etdiler. Konsert «Lälezar» halk saz gurallary orkestriniň ýerine ýetirmeginde «Galkynyş mukamy» sazy bilen başlandy. Bu belentden ýaňlanan şirin owazlar kalplara ýakymly täsirleri paýlady.
Zehinli ýaşlar milli kompozitorlarymyzyň meşhur saz eserleriniň birnäçesini ussatlyk bilen ýerine ýetirdiler. «Bedirkent owazlary» bagşylar ansamblynyň «Arkadagym bilen Dana Pyragy», «Altyn nesil» tans toparynyň «Katýuşa», «Saýrak bilbiller» üflenip çalynýan saz gurallar ansamblynyň «Ýar olmagyn», «Ýaşlyk» uly ýaşly hor toparynyň «Hoş niýetli arzuwlar», «Ýaşlyk» kiçi ýaşly hor toparynyň «Biz Watanyň balasy», «Mukam» dutarçylar ansamblynyň «Ýatlama», .«Şirin owaz» akkordeonçylar ansamblynyň «Bibijan», fortepiano ansamblynyň «Döwranyň aýdymy», «Altyn nesil» tans toparynyň «Arkadagly Serdar bilen», «Şowhun» deprekçiler ansamblynyň «Her çemenden bir gunça» ýaly aýdym-sazlaryň we tanslaryň ýerine ýetirilmegi ýaş zehinleriň sungat äleminde kämillik basgançaklaryny üstünlikli geçýändiklerine şaýatlyk edýär. Ýaşlaryň belent ruha beslenen şatlyk-şowhunly çykyşlary ýurdumyzyň medeniýetini we sungatyny has hem belende çykarjak zehinli ýaşlaryň kemala gelýändiginiň subutnamasy boldy.
Hasabat konsert «Ýaşlyk» hor toparynyň ýerine ýetirmeginde «Arkadag» aýdymy bilen jemlendi. Konsertiň ahyrynda üstünlikli çykyş eden toparlara Türkmenistanyň Magtymguly adyndaky Ýaşlar guramasynyň ýerli Geňeşi tarapyndan Hormat hatlary we ýadygärlik sowgatlar dabaraly ýagdaýda gowşuryldy
Aýdym-saz sungatyny öwrenmekde we dünýä ýaýmakda bimöçber işleri alyp barýan hormatly Prezidentimiziň hem-de türkmen halkynyň Milli Lideri Gahryman Arkadagymyzyň janlary sag, ömürleri uzak, belent başlary aman bolsun! Il-ýurt bähbitli alyp barýan işleri hemişe rowaçlyklara beslensin!
Altyn ATAKOWA,
TMÝG-niň Daşoguz welaýatynyň
Görogly etrap Geňeşiniň bölüm müdiri.
