2024-nji ýylyň 16-njy maýynda “Türkmennebit” DK-niň Balkanabat nebitçilik orta hünär okuw mekdebinde Türkmenistanyň Magtymguly adyndaky Ýaşlar guramasynyň Balkanabat şäher Geňeşi, Balkanabat şäher Polisiýa bölüminiň raýatlary pasportlaşdyrmak we hasaba alyş bölümçesi bilen bilelikde 16 ýaşa ýeten ýaş raýatlara pasportlaryny gowşurmak dabarasyny geçirdi. Çärä Balkanabat şäheriniň çäginde ýerleşýän mekdeplerde bilim alýan 16 ýaşyny dolduran okuwçy ýaşlar gatnaşdy.
Çärede çykyş edenler pederlerimiziň pentleriniň durşy bilen pähim-paýhasa, terbiýä ýugrulandygyny, ýaşlarymyzyň Watanymyzyň geljegidigini nygtadylar. Ýaş nesilleri terbiýelemäge hemişe uly üns berip gelýän halkymyz özüniň geljegini ýaşlar bilen baglanyşdyrýar.
Şeýle hem, dabaraly çärede hormatly Prezidentimiziň baştutanlygynda sagdyn nesli kemala getirmegiň esaslaryny goýmakda gazanylan uly üstünlikler hakynda guwanç bilen gürrüň edildi, Türkmen halkynyň Milli Lideri Gahryman Arkadagymyza, hormatly Prezidentimize çuňňur hoşallyk sözleri aýdyldy.
Çäräniň ahyrynda TMÝG-niň Balkanabat şäher Geňeşi tarapyndan ýaşlara ýadygärlik sowgatlary gowşuryldy.
Annaniýaz SAPAÝEWA,
TMÝG-niň Balkanabat şäher Geňeşiniň
guramaçylyk bölüminiň esasy hünärmeni.
