Türkmenistan şu ýylyň ýanwar — aprel aýlarynda okamak üçin Özbegistana baran raýatlarynyň sany boýunça 2-nji orny eýeledi. Bu barada Özbegistanyň Prezidentiniň ýanyndaky Statistika agentligi habar berdi.
Hasabata görä, 2024-nji ýylyň 4 aýynda 1 müň 627 sany türkmenistanly Özbegistana barypdyr. Bu babatda Türkmenistan diňe Hindistandan (2 müň 90 sany) yzda orun alypdyr. Şeýle-de sanawyň ilkinji bäşliginde Täjigistanyň (758 sany), Gyrgyz Respublikasynyň (317 sany) hem-de Koreýa Respublikasynyň (249 sany) ady bar.
Ýeri gelende bellesek, hasabat döwründe Özbegistana okamak üçin baran daşary ýurtlularyň sany 6,4 müň sany bolup, şonuň 25 göterimi türkmenistanlylardyr. Munuň özi iki ýurduň arasyndaky ylym-bilim hyzmatdaşlygynyň ýokarlanýandygynyň alamatydyr.
türkmenportal.com
