Türkmenistanyň Maglumat elýeterliligi merkeziniň işgärleri A.Hudaýgulyýewa we S.Amandurdyýewa Seul şäherine çagyryldy. Olar 27-nji maý – 8-nji iýun aralygynda Koreýanyň Milli maglumat jemgyýetiniň guramagynda geçirilen Maglumat elýeterliligi merkeziniň dolandyryjy okuw maslahatyna (2024 IAC Administrator Training Program) gatnaşdylar.
Okuw maslahatynyň dowamynda Koreýa Respublikasynyň öňdebaryjy uniwersitetleriniň we ylmy-gözleg merkezleriniň mugallymlary maglumat üpjünçiligi, emeli aň tehnologiýalary, maşyn arkaly öwrediş, maglumat we aragatnaşyk ulgamlary, şeýle hem maglumat elýeterliligi merkezleriniň netijeli dolandyrylyşyny meýilleşdirmek boýunça nazary hem amaly sapaklary geçirdiler. Okuw maslahatyna Serbiýa, Kosta-Rika, Panama, Kolumbiýa, Nigeriýa, Gana, Butan, Şri-Lanka, Pakistan, Özbegistan hem-de Türkmenistan ýaly 11 döwletiň Maglumat elýeterliligi merkezleriniň wekilleri gatnaşdylar.
Habar berlişine görä, 2023-2024-nji ýyllaryň dowamynda «Iň gowy maglumat elýeterliligi merkezi» diýen at birinji orna mynasyp bolan Özbegistana berildi, Türkmenistanyň wekiliýeti ikinji orna mynasyp boldy. Gana üçünji orny eýeledi. Maglumat elýeterliligi merkezleriniň işine baha berlende, esasy üns merkezleriň işiniň netijeleri hakyndaky hasabata, hödürlenýän hyzmatlar barada halk köpçüligine maglumat bermek we halkara guramalar bilen hyzmatdaşlyk ýaly görkezijilere gönükdirildi.
Birnäçe ýyl mundan öň Türkmenistanyň Bilim ministrliginiň innowasiýa we maglumat merkeziniň çäginde Koreýa Respublikasynyň Milli Maglumat jemgyýeti guramasy bilen bilelikde döredilen Aşgabat Maglumat elýeterliligi merkezi häzire çenli uly üstünliklere eýe boldy. Şu ýyl bolsa 56 merkeziň arasynda «Best IAC Center Award 2024» baýragyna mynasyp boldy.
SalamNews
