Hormatly Prezidentimiziň golaýda geçirilen Ministrler Kabinetiniň giňişleýin mejlisinde kabul eden «BitarapTürkmenistanyň daşary syýasat ugrunyň 2017 — 2023-nji ýyllar üçin Konsepsiýasynda» türkmen Bitaraplygynyň hoşniýetli, özara bähbitli, parahatçylyk söýüjilikli we döredijilikli ýörelgeleri öz aýdyň beýanyny tapýar. Ýurdumyzyň açyklygy, giň hyzmatdaşlygy ösdürýändigi, dünýädäki oňyn tejribäni kabul etmegi, sebit we ählumumy derejedäki meseleleri çözmekde işjeň, parahatçylyk döredijilikli ýörelgä eýermegi daşary syýasy strategiýanyň üstünlikli bolmagyna ýardam edýär.
daşary syýasatynyň esasy ýörelgeleri ählumumy we sebit derejesindäki meseleleriň parahatçylykly, syýasy-diplomatik serişdeler arkaly çözülmegine esaslanýar. Bu ýörelge abadançylygyň üpjün edilmegine, ýurtlaryň we halklaryň arasynda netijeli gatnaşyklaryň saklanmagyna, medeniýetleriň ýakynlaşmagyna we özara baýlaşdyrylmagyna gönükdirilendir. Hormatly Prezidentimiziň öňdengörüjilikli başlangyçlary esasynda ýurdumyzyň halkara giňişligindäki abraýy barha berkeýär. Parahatçylyk döredijilikli, dost-doganlyk, deňhukukly hyzmatdaşlyk ýörelgelerine esaslanýan daşary syýasy meýillerini özünde jemleýän daşary syýasat ugrunyň işjeň durmuşa geçirilmegi bu ugruň netijeli ösýändigine şaýatlyk edýär. Hormatly Prezidentimiz golaýda geçirilen Ministrler Kabinetiniň giňişleýin mejlisinde Türkmenistanyň daşary syýasat işiniň ileri tutulýan ugurlaryny kesgitlemek, onuň syýasy-hukuk esaslaryny mundan beýläk-de kämilleşdirmek, halkara syýasat ulgamynda döwletiň öňünde durýan wezipeleriň netijeli ýerine ýetirilmegini üpjün etmek maksady bilen, “Bitarap Türkmenistanyň daşary syýasat ugrunyň 2017 — 2023-nji ýyllar üçin Konsepsiýasyny tassyklamak” hakynda resminama gol çekdi.
Ýurdumyzyň daşary syýasatynyň üstünlikli amala aşyrylmagynda diplomatik gullugyň hünärmenleriniň üstüne örän jogapkärli wezipeler düşýär. Diplomatiýa — munuň özi gatnaşyklary ýola goýmagyň we sazlaşykly ösdürmegiň gadym döwürlerden bäri dowam edip gelýän usuly bolup, ol häzirki günlerimizde oňyn ösüşe eýe boldy. 2007-nji ýylyň dekabrynda paýtagtymyzda açylan Merkezi Aziýa üçin BMG-niň Öňüni alyş diplomatiýasynyň sebit merkeziniň üstünlikli iş tejribesi munuň aýdyň mysalydyr.
Ýurdumyzyň daşary syýasy giňişliginde ileri tutulýan ugurlaryň biri hem ylym-bilim ulgamydyr. Hormatly Prezidentimiziň başlangyjy bilen açylan Türkmenistanyň Daşary işler ministrliginiň Halkara gatnaşyklary institutynda ýaş diplomatlar, halkara žurnalistler taýýarlanylýar. Bu institut häzirki wagtda dünýäniň birnäçe abraýly halkara guramalarynyň ýurdumyzdaky wekilhanalary bilen işjeň hyzmatdaşlyk saklaýar. Bu ýokary okuw mekdebinde halkara bilermenleriň gatnaşmaklarynda diplomatiýanyň dürli ugurlaryna degişli okuwlar yzygiderli geçirilýär. Munuň özi talyplaryň syýasy diplomatik düşünjeleriniň artmagyna, diplomatik etikanyň kadalary boýunça dünýägaraýyşlarynyň giňelmegine ýardam edýär.
Şondan bäri hem bu ýokary okuw mekdebinde türkmen diplomatiýasynyň ýaş hünärmenleri taýýarlanylýar. Institutda 4 sany fakultet — Halkara gatnaşyklary, Halkara hukuk, Halkara ykdysady gatnaşyklar we Halkara žurnalistikasy fakultetleri hereket edip, olarda talyplara halkara diplomatiýasy ugrundan tejribeli mugallymlar bilim berýärler. Institutda hereket edýän hal halkara žurnalistikasy hünäri boýunça bilim berilmegi ýurdumyzda ilkinji gezek şu ýokary okuw mekdebinde ýola goýuldy. Hormatly Prezidentimiziň tagallasy bilen 2011-nji ýylda Türkmenistanyň Daşary işler ministrliginiň Halkara gatnaşyklary instituty özüniň täze döwrebap binasyna eýe boldy. Bu ýerde geljekki ýaş diplomatlary, halkara žurnalistleri taýýarlamak üçin dünýä ülňülerine laýyk gelýän iň ýokary şertler, amatlyklar döredilen.
Hormatly Prezidentimiziň başlangyçlary bilen 2013-nji ýyldan bäri institutyň uçurym ýylynyň talyplarynyň tejribeliklerini Türkmenistanyň daşary ýurtlardaky ilçihanalarynda we konsullyk edaralarynda geçmekleri ýola goýuldy. Bu çözgüdiň ýaş hünärmenleriň öz işlerini has kämil ele almaklary, hünär aýratynlyklary bilen iş ýüzünde tanyşmaklary, daşary ýurtlaryň halklarynyň milli däpleri hakynda has içgin bilmekleri, daşary ýurt dillerini has kämil özleşdirmekleri üçin örän uly mümkinçilik döredýändigini institutyň mugallymlary aýdýarlar. Türkmen diplomatiýasynyň milli mekdebiniň uçurymlary bu gün ýurdumyzyň daşary ýurtlardaky diplomatik edaralarynda, ýurdumyzyň hukuk goraýjy edaralarynda, köpçülikleýin habar beriş serişdelerinde işleýärler.
Diplomatlaryň iş ugurlarynyň çygry örän giňdir we köpugurlydyr. Bu gulluk özünde örän uly, jogapkärli wezipeleri jemleýär, diplomatlaryň dürli ugurlar boýunça köp derejeli taýýarlygyny talap edýär. Şonuň üçin bu ýokary okuw mekdebinde ýaşlara diplomatik gullugyň hünärmenleriniň öňünde durýan jogapkärli wezipeler çuňňur, hemmetaraplaýyn kesgitlenilýär, öwredilýär. «Diplomatik» diýen düşünje halkara gatnaşyklary çygrynda diňe Türkmenistanyň däl, eýsem onuň raýatlarynyň we ýuridik şahslarynyň hukuklaryna hem-de kanuny bähbitlerine wekilçilik etmek, olary goramak bilen baglanyşykly bolup durýar. Türkmenistanyň daşary ýurt döwletleri we halkara guramalar bilen ikitaraplaýyn we köptaraplaýyn syýasy, söwda-ykdysady, ylym-bilim, medeni, ynsanperwerlik we beýleki gatnaşyklary ösdürmek, daşary ýurt döwletleri we halkara guramalar bilen gatnaşyklarda Türkmenistanyň hoşniýetli, parahatçylyk söýüji, özara bähbitli, deňhukukly daşary syýasat ugruny durmuşa geçirmegi üpjün etmek milli diplomatiýa gullugynyň baş wezipeleri bolup durýar.
Geljekki ýaş türkmen diplomatlaryna Türkmenistanyň halkara abraýynyň has-da ýokarlanmagy, içeri we daşary syýasatyň dünýä giňişliginde wagyz edilmegi, halkara guramalar bilen gatnaşyklaryň berkidilmegi, daşary döwletleriň diplomatik wekilhanalary bilen üstünlikli gatnaşyklaryň saklanmagy ugrundaky jogapkärli işlerde uly üstünlikleriň ýar bolmagyny arzuw edýäris.
Oguljemal NURMYRADOWA,
žurnalist.
“Nesil”gazeti,
21.02.2017ý.
