Golaýda Türkmenistanyň Magtymguly adyndaky Ýaşlar guramasynyň Mary welaýatynyň Garagum etrap Geňeşiniň we etrap bilim bölüminiň bilelikde guramagynda etrabyň 6-njy orta mekdebinde “Ýol hereketiniň howpsuzlygy — ömrümiziň rahatlygy” atly wagyz-nesihat duşuşygy geçirildi.
Çäräniň dowamynda etrap Polisiýa bölüminiň kämillik ýaşyna ýetmedikleriň işi boýunça bölümçesiniň müdiri, polisiýanyň maýory Arslan Jepbarow, etrap Polisiýa bölüminiň polisiýanyň ýol gözegçilik bölümçesiniň serkerdesi, polisiýanyň kapitany Merdan Baýkulyýew, Türkmenistanyň Magtymguly adyndaky Ýaşlar guramasynyň Mary welaýatynyň Garagum etrap Geňeşiniň Guramaçylyk bölüminiň sanly ulgam boýunça esasy hünärmeni Gülnar Gurbanmyradowa dagylar çykyş etdiler. Olar öz çykyşlarynda köçe-ýol hereketiniň düzgünleriniň berjaý edilmeginiň ähmiýetini, sürüjilik şahadatnamasyz ulaglara erk etmegiň gadagandygyny düşündirip, ýol hereketiniň howpsuzlygynyň üpjün edilmeginiň özümize bagly bolup durýandygyny aýratyn nygtadylar.
Duşuşygyň ahyrynda oňa gatnaşanlar türkmen halkynyň asuda, parahat durmuşda ýaşamagy ugrunda giň gerimli işleri durmuşa geçirýän Gahryman Arkadagymyzyň, Arkadagly Gahryman Serdarymyzyň adyna alkyş sözlerini beýan etdiler.
Sülgün AGAJANOWA,
Türkmenistanyň Magtymguly adyndaky Ýaşlar guramasynyň
Mary welaýatynyň Garagum etrap Geňeşiniň başlygy.
