Berkarar döwletiň täze eýýamynyň Galkynyşy döwründe ýurdumyzda ýaşlaryň döredijilik mümkinçiliklerini açmak, olaryň zehinlerini ýüze çykarmak hem-de watansöýüjilik ruhunda terbiýelemek ugrunda giň gerimli işler alnyp barylýar. Şoňa laýyklykda, jemgyýetçilik guramalary hem döredijilik ugurly çäreleri yzygiderli geçirýär.
Golaýda, paýtagtymyzda ýerleşýän Jemgyýetçilik guramalarynyň merkezi binasynda Türkmenistanyň Magtymguly adyndaky Ýaşlar guramasynyň Merkezi Geňeşiniň ýanyndaky Maglumat, maslahat beriş we meýletinçilik hereketiniň işleri boýunça Merkeziniň «Ýaş şahyrlar we žurnalistler» gurnagynyň nobatdaky duşuşygy geçirildi. Duşuşyga ýurdumyzda giňden tanalýan döredijilik işgärleri, şahyr Gurbanjemal Annakowa we ýazyjy-žurnalist Aşyrmät Garlyýew hormatly myhmanlar hökmünde gatnaşyp, öz döredijilik tejribeleri, žurnalistikananyň we poeziýanyň inçe syrlary baradaky oý-pikirlerini ýaşlar bilen paýlaşdylar.
Myhmanlar döredijilik ýolunyň başlangyjynda sabyr, yhlas we okyjynyň öňündäki jogapkärçiligiň aýratyn uly ähmiýete eýedigini nygtadylar. Gurbanjemal Annakowa çykyşynda ýaşlara döredijilikde çeperçilik bilen bir hatarda ahlak päkliginiň hem zerurdygyny düşündirdi.
Aşyrmät Garlyýew bolsa sözüniň dowamynda žurnalistikananyň jemgyýetiň ruhy-medeni durmuşyndaky ornuna ünsi çekip, her bir maglumadyň, makalanyň we teswiriň jemgyýetçilik jogapkärçiligini talap edýändigini, dilimiziň gözelligini gorap, ýazuw sungatymyzy kämilleşdirsek halkymyzyň medeniýetini baýlaşdyrmaga ýardam edýändigini aýratyn nygtady.
Duşuşyk pikir alşylmalar, sowal-jogaplar, döredijilikli çykyşlar hem-de täze döredilen goşgularyň okalmagy bilen dowam etdi. Ýaşlaryň dürli mazmunly goşgulary diňlenildi, olaryň her birine tejribeli döredijilik işgärleri tarapyndan ýerlikli usulyýet maslahatlary berildi. Şeýle hem sungat älemine öz ilkinji ädimlerini goýýan ýaş şahyrlara döredijilikde kämilleşmegiň ýol-ýörelgeleri barada täsirli maslahatlar berildi. Bu duşuşyk ýaşlarda milli döredijilik ýörelgelerine hormat goýup, kämil jemgyýet gurmakda sözüň, şygryň, döredijiligiň tutýan ornuny has-da ýokarlandyrýan çuň manyly çäreleriň biri hökmünde ýatda galdy.
Duşuşygyň ahyrynda gatnaşyjy ýaşlar şeýle döredijilik duşuşyklarynyň öňlerinde täze mümkinçilikleri açýandygyny, döredijilik ruhuny has-da pugtalandyrýandygyny aýdyp, şeýle mümkinçilikleri döredip berýän Gahryman Arkadagymyza, Arkadagly Gahryman Serdarymyza çäksiz hoşallyk sözlerini aýtdylar.
Annageldi GODOROW,
Türkmenistanyň Magtymguly adyndaky Ýaşlar guramasynyň
Merkezi Geňeşiniň ýanyndaky Maglumat, maslahat beriş we
meýletinçilik hereketiniň işleri boýunça Merkeziniň başlygy.
