Türkiýede geçirilen Mersin şäher häkimliginiň IX halkara küşt ýaryşynda Türkmenistanyň halkara grossmeýsteri Meýlis Annaberdiýew ýeňiji boldy.
Ýaryş şweýsar ulgamynyň düzgünleri boýunça 9 tapgyrda geçirildi we oňa 19 ýurtdan gelen 360 küştçi gatnaşdy, olar dört dereje boýunça baýraklar ugrunda bäsleşdiler. Meýlis Annaberdiýew (FIDE reýtingi – 2407) iň ýokary «A» derejesinde ýeňiji boldy, bu ýerde 12 ýurtdan 50-ä golaý küştçi bäsleşdi, olaryň arasynda 7 halkara grossmeýsteri, şol sanda 1 zenan, 3 halkara ussat, 10 FIDE ussatlary bardy.
Ilkinji bäşligiň hataryndaky garşydaşlaryna garşy bäş oýunda ýeňiş gazanyp, dört gezek deňme-deň oýnan watandaşymyz ýedi utuk toplady. Halkara ussat Araş Tahbaz (Eýran, 2468) hem deň utuk gazandy. Netijede, birinji orun goşmaça koeffisiýent bilen kesgitlendi, Meýlisiň koeffisiýenti has ýokarydy. Eýranly halkara grossmeýster Arýan Golami (FIDE reýtingi – 2468) 6,5 utuk bilen ilkinji üçlügi tamamlady. Birinji orunda barýan azerbaýjanly grossmeýster Wugar Rasulow (FIDE reýtingi – 2525) bolsa bäşinji orny eýeledi.
24-nji noýabrda 40 ýaşy dolýan Meýlis Annaberdiýew Türkmenistanyň iň meşhur küştçüleriň biridir. Ol 7 ýaşynda küşt bilen gyzyklanyp başlaýar, oňa uly agasy Serdar Annaberdiýew kömek edýär. Ol Meýlisiň ilkinji we häzirki wagta çenli ýeke-täk tälimçisidir. Şu ýyl Türkmenistanyň at gazanan tälimçisi, şeýle hem ýurdumyzyň ýaşlar ýygyndy toparynyň baş tälimçisi S.Annaberdiýew 50 ýaşady.
2017-nji ýylda Aşgabatda geçirilen Ýapyk binalarda we söweş sungaty boýunça V Aziýa oýunlarynda Meýlis Annaberdiýew Türkmenistanyň toparynyň düzüminde rapid boýunça (tiz küşt) bürünç medal gazandy.
Häzirki wagtda ol, şeýle hem Türkmenistanyň erkekler ýygyndysynyň agzasydyr. Geçen ýyl Wengriýanyň paýtagty Budapeştde geçirilen 45-nji Dünýä küşt olimpiadasynyň «B» toparynda Türkmenistanyň ýygyndysy kiçi altyn medala mynasyp boldy. Şeýlelikde, biziň toparymyzyň düzüminde iň gowy netijäni Meýlis görkezdi, ol 2-nji tagtada mümkin bolan 11 utukdan 7-sini gazandy.
Bu ýyl Meýlis Annaberdiýew Türkiýäniň Kappadokiýa şäherinde geçirilen halkara ýaryşynda kümüş medal gazandy. Indi bolsa Mersindäki ýaryşda altyn medala eýe bolup, 150 müň türk lirasy (3500 dollardan gowrak) möçberinde pul baýragyna hem mynasyp boldy.
turkmenistan.gov.tm
