Lebap welaýatynyň Türkmenabat şäherindäki 14-nji sport mekdebinde Türkmenistanyň Içeri işler ministrliginiň Döwlet ýangyn howpsuzlygy gullugynyň işgärleriniň arasynda bäsleşik geçirildi. Ýangyn-amaly sportunyň derejesini ösdürmek hem-de şahsy düzümiň hünär ussatlygyny kämilleşdirmek maksady bilen geçirilen bäsleşige Aşgabat şäheriniň we ýurdumyzyň welaýatlarynyň polisiýa müdirlikleriniň ýangyn howpsuzlygy bölümleriniň işgärlerinden düzülen toparlar gatnaşdylar. Bäsleşik toparlaryň dabaraly ýörişi, şeýle hem medeniýet we sungat işgärleriniň dabaraly konserti bilen badalga aldy.
Bäsleşige gatnaşyjylar ýangyn söndüriji enjamlary ulanmak arkaly 100 metr päsgelçilikli aralygy geçmek, ýangyn söndüriji enjamlary ýüzugruna ulanyp, estafeta ylgawy, 4x100 metr päsgelçilikli aralygy geçmek, toparlaýyn söweşjeň ýaýbaňlandyrma we zabt ediş merdiwany bilen okuw minarasynyň dördünji gatyna çykmak boýunça bäsleşdiler. Berlen şertlere görä, işgärler öz başarnyklaryny, ussatlyklaryny görkezdiler. Ýaryşyň netijesi boýunça Mary welaýatynyň ýangyn söndürijiler topary I baýrakly orna mynasyp boldy we ýaryşyň göçme kubogyny eýeledi. Lebap hem-de Balkan welaýatlarynyň toparlary hem degişlilikde, II we III baýrakly orunlary gazandylar. Bäsleşikde üstünlikli çykyş eden toparlaryň ählisine ýörite diplomlar we ýadygärlik sowgatlary dabaraly ýagdaýda gowşuryldy.
Döwran HEMRAÝEW,
TMÝG-niň Lebap welaýatynyň
Türkmenabat şäher Geňeşiniň bölüm müdiri.
