Türkmenistanyň Magtymguly adyndaky Ýaşlar guramasynyň Merkezi Geňeşiniň we Lebap welaýat Geňeşiniň, Türkmenistanyň Parahatçylyk Gaznasynyň müdiriýetiniň bilelikde guramaklarynda Lebap welaýat kitaphanasynda «Kitap — dünýäniň açary» atly ylmy-amaly maslahat geçirildi. Oňa Ýaşlar guramasynyň welaýat, Türkmenabat şäher, Saýat, Dänew we Çärjew etrap Geňeşleriniň işgärleri, kitaphanaçylar, döredijilik işgärleri, talyp ýaşlar we mekdep okuwçylary gatnaşdylar.
Arkadagly Gahryman Serdarymyzyň: «Ýurdumyzda ýaşlar döwlet syýasatyny ýaşlaryň arasynda giňden wagyz-nesihat etmekde we ony üstünlikli durmuşa geçirmekde Milli Liderimiz Gahryman Arkadagymyzyň çuňňur pähim-paýhasa, baý many-mazmuna ýugrulan ajaýyp kitaplary gymmatly gollanmadyr, ylym-bilim, edep-terbiýe, babatda görelde mekdebidir» diýen parasatly jümlelerinden ugur alyp, kitaphon jemgyýeti döretmek, maksady bilen geçirilen bu maslahat bagtyýar ýaşlaryň arasynda uly ruhubelentlik döretdi. Maslahatda edilen täsirli çykyşlarda ýaşlaryň kitaba söýgüsini we gyzyklanmasyny artdyrmak, kitaphanalaryň işini döwrebap derejede guramak, ýaşlaryň dürli neşirlere we gollanmalara elýeterliligini gazanmak ugrunda durmuşa geçirilýän toplumlaýyn işler barada aýratyn nygtaldy.
Kitaphana işgärleri öz çykyşlarynda ýaşlaryň ylymly-bilimli nesiller bolup ýetişmekleri üçin ýurdumyzda giň mümkinçilikleriň döredilýändigini, şeýle-de kitaphanada ýaş okyjylaryň sanynyň gün-günden artýandygyny uly buýsanç bilen nygtadylar. Şeýle-de bu çäräniň dowamynda kitap okamaklygyň gymmatyny ýaşlaryň arasynda wagyz-nesihat etmekligiň usullary ara alnyp maslahatlaşyldy. Maslahata gatnaşyjylar ýaşlaryň bagtyýar şu gününi we nurana ertirini berkarar etmek ugrunda şeýle giň mümkinçilikleri döredip berýän Gahryman Arkadagymyza we hormatly Prezidentimize köp sagbolsunlaryny beýan etdiler. Soňra maslahata gatnaşyjylar kitaphana işgärleri tarapyndan guralan giňişleýin kitap sergisine syn etdiler.
Leýla AMANOWA,
TMÝG-niň Lebap welaýat Geňeşiniň
sanly ulgam boýunça esasy hünärmeni.
