«Pähim-paýhas ummany Magtymguly Pyragy» ýylynyň şu günlerinde welaýat merkezimiz Türkmenabat şäherinde Türkmenistanyň we Özbegistan Respublikasynyň ikinji sebitara forumy hem-de Özbegistanda öndürilýän harytlaryň milli sergisi dowam edýär. Bu ähmiýetli çäräniň geçirilmegi ýurtlaryň arasynda dost-doganlyk gatnaşyklaryny berkitmekde, durnukly ösüşi we hyzmatdaşlygy pugtalandyrmakda nobatdaky üstünlikli ädimleriň biri boldy.
Türkmenabat şäherine aýratyn gözellik berýän «Türkmeniň ak öýi» binasynda geçirilýän bu sergide iki goňşy ýurduň kärhanalary we işewürleri tarapyndan öndürilýän dürli harytlar görkezilýär. Bu ýerde orun alan milli harytlar şäheriň ýaşaýjylarynda we myhmanlarynda aýratyn täsir galdyrýar. Çärä gatnaşyjylar şeýle forumlaryň geçirilmeginiň halklaryň arasynda ykdysady hyzmatdaşlygy ilerletmekde, haryt alyş-çalşygyny ösdürmekde aýratyn ähmiýete eýedigini nygtaýarlar. Şeýle-de bu halkara sergi iki ýurduň arasynda dürli önümleriň alyş-çalşygynyň artýandygyny ýene-de bir gezek subut edýär. Çärä gatnaşyjylar halklaryň arasynda şeýle dostluk we hyzmatdaşlyk gatnaşyklaryny berkitmäge giň mümkinçilikleri döredip berýän hormatly Prezidentimize sagbolsunlaryny beýan edýärler.
Döwran HEMRAÝEW,
TMÝG-niň Lebap welaýatynyň
Türkmenabat şäher Geňeşiniň bölüm müdiri.
