Gahryman Arkadagymyzyň, peder ýoluny mynasyp dowam etdirýän Arkadagly Gahryman Serdarymyzyň taýsyz tagallalary bilen ýurdumyzda ýaşlaryň sagdyn, bagtyýar ösüp ulalmaklary, watançy, päk ahlakly, merdana we halal adamlar bolup ýetişmekleri ugrundaky aladalaryndan ugur alyp, şeýle hem ösüp gelýän ýaş nesliň sungat äleminde zehinli hünärmenler bolup ýetişmeklerini gazanmak maksady bilen ýurdumyzda dürli bäsleşikler geçirilýär. Biz hem ýaşlaryň döredijilik ukyplaryny has-da kämilleşdirmäge gönükdirilen döwlet syýasatyny iş ýüzünde durmuşa geçirmek maksady bilen Türkmenistanyň Bilim ministrliginiň Türkmenistanyň Magtymguly adyndaky Ýaşlar guramasynyň Merkezi Geňeşi bilen bilelikde Halkara Bitaraplyk güni mynasybetli ýurdumyzyň umumy bilim berýän mekdepleriniň 3-5-nji synplarynda okaýan okuwçy oglanlaryň arasynda yglan edilen «Merdana nesil — 2024» atly şadyýan bäsleşiginiň Türkmenabat şäher tapgyryny geçirdik. Türkmenabat şäherindäki ýöriteleşdirilen 39-njy orta mekdebinde geçirilen bu bäsleşige Türkmenabat şäheriniň ähli orta mekdeplerinden başarjaň oglanlar gatnaşyp, öz ussatlyklaryny görkezdiler.
Bäsleşigiň netijeleri boýunça Türkmenabat şäheriniň 2-nji orta mekdebiniň okuwçysy Umyt Töräýew birinji, 33-nji orta mekdebiň okuwçysy Maksat Bäşimbaýew ikinji baýrakly orunlara mynasyp boldular. Türkmenabat şäheriniň 2-nji orta mekdebiniň okuwçysy Atajan Babahanow, 14-nji orta mekdebiň okuwçysy Maksat Myradow, 30-nji orta mekdebiň okuwçysy Azim Rozybaýew, 18-nji orta mekdebiň okuwçysy Jeýhun Rejepbaýew dagylar bolsa bäsleşikde üçünji orny eýelediler. Bäsleşigiň ýeňijileri gazanan üstünlikleri bilen gutlanyldy, olara geljekde bilimli, sowatly hünärmenler bolup ýetişip, Watanymyzyň gülläp ösmegine özleriniň mynasyp goşantlaryny goşmaklary arzuw edildi. Ýeňijilere Türkmenistanyň Magtymguly adyndaky Ýaşlar guramasynyň Lebap welaýatynyň Türkmenabat şäher Geňeşiniň adyndan ýörite taýýarlanan ýadygärlik sowgatlary we Hormat hatlary dabaraly ýagdaýda gowşuryldy.
Begenç ÇARYÝEW,
TMÝG-niň Lebap welaýatynyň
Türkmenabat şäher Geňeşiniň
Guramaçylyk bölüminiň esasy hünärmeni.
