Ýetip gelýän Täze — 2025-nji ýyl mynasybetli Türkmenabat şäherindäki Bagt köşgi toý mekanynda «Hoş geldiň Täze ýyl, eziz Diýara!» atly aýdym-sazly, şowhunly baýramçylyk dabarasy geçirildi. Türkmenistanyň Magtymguly adyndaky Ýaşlar guramasynyň Türkmenabat şäher Geňeşiniň, Türkmenistanyň Demokratik partiýasynyň Türkmenabat şäher komitetiniň, Türkmenistanyň Agrar partiýasynyň Türkmenabat şäher komitetiniň we Türkmenabat şäher medeniýet merkeziniň bilelikde guramaklarynda geçirilen bu dabara joşgunly çykyşlara baý boldy.
Dabara Türkmenistanyň Ýaşlar baýragynyň eýeleri, döredijilik bäsleşikleriniň ýeňijileri, şanly ýylymyzy beýik zähmet ýeňişleri bilen jemlän ildeşlerimiz, jemgyýetçilik guramalarynyň işjeň agzalary we talyplar gatnaşdylar. Bagtyýar ildeşlerimiziň baýramçylyk gutlaglarynda akyldar şahyrymyzyň doglan gününiň 300 ýyllygyna bagyşlanan «Pähim-paýhas ummany Magtymguly Pyragy» ýylynda halkymyzyň bagtyýarlygyny üpjün etmek, röwşen geljegi berkarar etmek, ýaşlaryň kämilliklerini artdyrmak, bilimlerini çuňlaşdyrmak ugrunda durmuşa geçirilen beýik özgertmeler dogrusynda aýratyn nygtaldy.
Belentden ýaňlanan aýdym-sazlarda, joşgunly tanslarda bagtyýar döwrümiziň, nurana günlerimiziň waspy öz beýanyny tapdy. Dabara gatnaşyjylar türkmen halkynyň şeýle bagtyýar döwrüň hözirini görüp ýaşamagy üçin giň mümkinçilikleri döredip berýän Gahryman Arkadagymyzyň we Arkadagly Gahryman Serdarymyzyň janlarynyň sag, ömürleriniň uzak bolmagyny arzuw etdiler.
Narif BABAKULYÝEW,
TMÝG-nyň Lebap welaýat Türkmenabat şäher
Geňeşiniň hojalyk işleri boýunça esasy hünärmeni.
