Berkarar döwletiň täze eýýamynyň Galkynyşy döwründe hormatly Prezidentimiz Arkadagly Gahryman Serdarymyzyň baştutanlygynda ylym-bilime aýratyn üns gönükdirilip, ýaşlarymyza öz saýlan, höwes edýän hünäri boýunça okamaga, ökde hünärmenler bolup ýetişmäge giň mümkinçilikler döredilen. Şonuň bilen baglylykda ýurdumyzda ýylyň ýylyna dünýäniň ösen tehnologiýalary ornaşdyrylan döwrebap bilim ojaklary gurlup ulanylmaga berilýär. Bilim ulgamynda täze tehnologiýalaryň ornaşdyrylmagy ýaş nesliň ukyp-başarnygyny, dünýägaraýşyny, sowatlylyk derejesini has-da artdyrýar.
Türkmenistanyň Magtymguly adyndaky Ýaşlar guramasynyň Lebap welaýatynyň Kerki etrap Geňeşi, etrap bilim bölümi bilen bilelikde Kerki etrabynyň 22-nji orta mekdebinde 2025-nji ýylyň — «Halkara parahatçylyk we ynanyşmak» ýylynda Kerki etrap bilim bölüminiň işgärleriniň, öňdebaryjy ýaşlaryň arasynda «Bilim kämilligiň binýady» atly şygar bilen maslahat geçirildi. Onda Türkmenistanyň Magtymguly adyndaky Ýaşlar guramasynyň Lebap welaýatynyň Kerki etrap Geňeşiniň, Kerki etrap bilim bölüminiň wekilleri we mekdep müdirleri çykyş etdiler. Maslahatda geçen okuw ýylynda amala aşyrylan işler barada hasabat diňlenildi, olara seljerme berildi we ösüp gelýän ýaş nesle bilim we terbiýe bermek boýunça bilim işgärleriniň öňlerinde duran wezipeler ara alnyp maslahatlaşyldy. Maslahatda çykyş edenler bilim ulgamynda amala aşyrylýan özgertmeleriň berýän miweleri, mekdepleriň, çagalar baglarynyň maddy enjamlaýyn üpjünçiliginiň gowulandyrylmagynyň okuw-terbiýeçilik işlerini döwrüň talaplaryna laýyk guramaga giň mümkinçilikleri açandygy barada durup geçdiler. Maslahatyň dowamynda öňdebaryjy ýaş bilim işgärlerine Türkmenistanyň Magtymguly adyndaky Ýaşlar guramasynyň Lebap welaýatynyň Kerki etrap Geňeşi tarapyndan ýadygärlik sowgatlary gowşuryldy. Maslahatyň soňunda oňa gatnaşyjylar türkmen ýaşlaryna giň mümkinçilikleri döredip berýän Gahryman Arkadagymyza hormatly Prezidentimiz Arkadagly Gahryman Serdarymyza alkyşlaryny aýtdylar.
Arzuw RAHMANOWA,
Türkmenistanyň Magtymguly adyndaky
Ýaşlar guramasynyň Lebap welaýatynyň
Kerki etrap Geňeşiniň başlygy.
