Ýaňy ýakynda Dänew etrabynyň Medeniýet öýünde Türkmenistanyň Zenanlar birleşiginiň Lebap welaýatynyň Dänew etrap bölümi, etrap häkimligi, jemgyýetçilik guramalary bilen bilelikde gurnamagynda etrabyň edara-kärhanalarynda, zähmet çekýän aýal-gyzlaryň gatnaşmagynda zenan edebi we mertebesi, ony gorap saklamak, nesil terbiýesi, ruhy-ahlak ýörelgelerimiz barada düşündirmek maksady bilen, «Zenan mertebesi-ahlak gözelligi» atly wagyz-nesihat duşuşygy geçirildi. Duşuşykda çykyş edenler ýurdumyzda enelere hormat goýmakda, gelin-gyzlarymyzy döwletimiz tarapyndan alnyp barylýan uly ähmiýetli işlerde zenanlaryň tutýan ornunyň hem belentdedigi barada aýdyp müňýyllyklaryň dowamynda has ýokary derejä galan milli mukaddeslikleri gorap saklamagy we türkmen gelin-gyzlaryna mahsus bolan päklik, arassalyk, halallyk, wepalylyk ýaly gylyk-häsiýetleri dowam etmekligi belläp geçdiler. Mynasyp nesil terbiýesi biziň rowaçlyklarymyzyň gözbaşynda duran zenanlarymyzyň boýnuna düşýän esasy borçlaryň biridir. Edep-ekram mekdebi bolan zenanlarymyz, gyz-gelinlerimiziň edep-terbiýesiniň ähmiýeti dogrysynda geçirilen bu duşuşyk netijeli ähmiýete eýe boldy.
Duşuşygyň ahyrynda oňa gatnaşanlar türkmen halkynyň milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlarynyň sag, başlarynyň dik, il-ýurt bähbitli tutýan tutumly işleriniň rowaçlyklara beslenmegini arzuw etdiler.
Melike ROZYÝEWA,
Magtymguly adyndaky Ýaşlar guramasynyň
Lebap welaýatynyň Dänew etrap
Geňeşiniň baş hünärmeni.
