Ýakynda Türkmenistanyň Magtymguly adyndaky Ýaşlar guramasynyň Ahal welaýat Geňeşiniň hem-de welaýat Baş bilim müdirliginiň bilelikde guramagynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 4 ýyllygy mynasybetli Ahal welaýat Saglygy dikeldiş okuw-terbiýeçilik toplumynda dabara geçirildi.
«Ynsanperwerligiň we dostlugyň baýramy» atly dabara çagalaryň şatlyk şowhunyna beslendi. Saglygy dikeldiş okuw-terbiýeçilik toplumynyň okuwçylarynyň ýerine ýetiren şekillendiriş sungatyna degişli işleriniň sergisi myhmanlarda uly täsirleri döretdi. Ruhubelent çagalaryň çeken suratlarynda Diýarymyzyň gözellikleri, bagtyýar çagalyk giňden beýan edildi.
Aýdym-sazly dabaranyň dowamynda çagalar Watanymyzy, asuda durmuşymyzy, ajaýyp döwrümizi wasp edýän goşgularyny labyzly okadylar, ýurdumyzda ynsanperwerlik işleri amala aşyrýan, ýaş nesli döredijilikli zähmete hem-de ýagty geljege ruhlandyrýan Arkadagly Gahryman Serdarymyzyň, Gahryman Arkadagymyzyň adyna päk ýürekden çykýan alkyşlaryny aýtdylar.
Şanly senä bagyşlanan dabara tamamlanandan soňra, oňa işjeň gatnaşan çagalara Türkmenistanyň Magtymguly adyndaky Ýaşlar Guramasynyň Ahal welaýat Geňeşi tarapyndan sowgatlar gowşuryldy. Munuň özi çagalara şatlygyny goşalandyrdy.
Wepa ANNABERDIÝEW,
Türkmenistanyň Magtymguly adyndaky
Ýaşlar Guramasynyň Ahal welaýat
Geňeşiniň başlygynyň orunbasary.
