Türkmenistanyň Magtymguly adyndaky Ýaşlar guramasynyň Ahal welaýatynyň Tejen etrap Geňeşi we Türkmenistanyň Kärdeşler arkalaşyklarynyň Tejen etrap birleşmesi bilen bilelikde gurnamaklarynda çagalaryň tomusky dynç alyş möwsümlerini şadyýan geçirmeklerini, olaryň zehinlerini açyp görkezmeklerini gazanmak maksady bilen Kaka etrabyndaky «Ýaşyl ýaýla» çagalar sagaldyş – dynç alyş merkezinde Bagtyýar çagalaryň gatnaşmaklarynda «Ýaşlar – Watanyň daýanjy» ady bilen aýdym-sazly medeni-dynç alyş hem-de «Kim çalasyn – kim çakgan» ady bilen bäsleşik oýny çäresi geçirildi. Geçirilen bu çärä Kaka etrabyndaky «Ýaşyl ýaýla» çagalar sagaldyş-dynç alyş merkezinde dynç alýan çagalar gatnaşdylar. Dabarada körpelerden düzülen aýdym-saz toparlarynyň çykyşlaryna orun berildi. Olaryň ýaş kalplaryndan joşup çykan aýdymlar, tans çykyşlar bagtyýar çagalarda uly täsir galdyrdy. Labyzly okalan goşgular hem gyzgyn garşylandy. Dabaranyň geçýän ýerinde körpeleriň arasynda kim çalasyn kim çakgan oýunlary boýunça bäsleşikde ýeňiş gazanan körpelere Türkmenistanyň Magtymguly adyndaky Ýaşlar guramasynyň Ahal welaýatynyň Tejen etrap Geňeşi we Türkmenistanyň Kärdeşler arkalaşyklarynyň Tejen etrap birleşmesi tarapyndan baýramçylyk sowgatlary gowşuryldy.
Aşyrberdi AÝDOGDYÝEW
Türkmenistanyň Magtymguly adyndaky
Ýaşlar guramasynyň Ahal welaýatynyň
Tejen etrap Geňeşiniň başlygy.
