Ýakynda Ahal welaýatynyň Sarahs etrabynyň 1-nji orta mekdebinde Türkmenistanyň Bilim ministrliginiň, Türkmenistanyň Parahatçylyk gaznasynyň müdirýetiniň, Türkmenistanyň Magtymguly adyndaky Ýaşlar guramasynyň, “Güneş” žurnalynyň redaksiýasynyň bilelikde guramagynda Halkara parahatçylyk we ynanyşmak ýylynda halkara Bitaraplyk güni mynasybetli ýurdumyzyň umumybilim berýän mekdepleriniň 4-12-nji synplarynda okaýan okuwçylaryň arasynda “Parahatçylyk: çagalaryň sesi” ady bilen yglan edilen döredijilik bäsleşiginiň etrap tapgyrynyň jemi jemlendi. Berkarar döwletiň täze eýýamynyň Galkynyşy döwründe ýaş nesli watançylyk, parahatsöýüjilik we ynsanperwerlik ruhunda terbiýelemek, ýurdumyzyň ýaşlarynyň ukyp-başarnyklaryny ýüze çykarmak maksady bilen geçirilýän bu döredijilik bäsleşigine mekdep okuwçylarynyň “Dünýä dursun parahat!” diýen temada ýazan düzmeleri, çeken suratlary we maketleri hödürlenildi.
Döredijilik bäsleşigine gatnaşan etrabyň umumybilim berýän mekdepleriniň 4-12-nji synp okuwçylarynyň hödürlän işlerinde hormatly Prezidentimiziň baştutanlygynda ýurdumyzyň ösüşi, parahatsöýüjilik ýörelgeleri, döwletimizde durmuşa geçirilýän beýik özgertmeler we ýetilen sepgitler, hemişelik Bitaraplygymyzyň gazananlary, ýaşlaryň bagtyýar durmuşy giňden wasp edilipdir. Bäsleşigiň netijeleri esasynda döredijilik bäsleşiginiň ýeňijileri yglan edilip, baýrakly orunlara mynasyp bolan mekdep okuwçylaryna Türkmenistanyň Magtymguly adyndaky Ýaşlar guramasynyň Hormat hatlary hem-de ýadygärlik sowgatlary gowşuryldy.
Gyzlargül ANNAGURDOWA,
Türkmenistanyň Magtymguly adyndaky Ýaşlar guramasynyň
Ahal welaýatynyň Sarahs etrap Geňeşiniň
Guramaçylyk bölüminiň müdiri.
