Şu gün ýurdumyzyň iň bir gelim-gidimli gözel künjekleriniň biri bolan “Hezzet” medeni dynç alyş merkezinde Türkmenistanyň Magtymguly adyndaky Ýaşlar guramasynyň Merkezi Geňeşiniň we Türkmenistanyň Senagatçylar we telekeçiler partiýasynyň bilelikde guramagynda bäsleşik geçirildi. “Türkmenistan – rowaçlygyň Watany” ýylynda “Türkmenistanda Ýaşlar baradaky döwlet syýasatynyň 2015-2020-nji ýyllar üçin döwlet Maksatnamasyny durmuşa geçirmegiň çäklerinde telekeçilik ulgamynda zähmet çekýän ýaşlaryň arasynda guralan bu bäsleşik milli Liderimiziň ýurdumyzda hususy pudagy ösdürmek boýunça amala aşyrýan oňyn özgertmelerini durmuşa geçirmekligi, şeýle-de ýurdumyzyň rowaçlygyna saldamly goşant goşýan ýaşlaryň aşhana işleri bilen bagly ukyp-başarnyklaryny açyp görkezmekligi we tapawutly ezber hünärmenleri ýüze çykarmaklygy maksat edindi. “Ezber elli aşpez” ady bilen guralan bäsleşige ýurdumyzyň öňdebaryjy hususy kärhanalaryndan, hojalyk jemgyýetlerinden ýaş gelin-gyzlaryň birnäçesi gatnaşdylar.
Bäsleşigiň adyndan hem mälim bolşy ýaly telekeçi gelin-gyzlar özaralarynda işdäaçar taýýarlamakda öz ezberliklerini görkezmek boýunça bäsleşdiler. Bäsleşigiň şertine laýyklykda oňa gatnaşyjy bäsdeşler 30 minudyň dowamynda ter gök önümlerinden dürli işdäaçarlary taýynladylar. Bir-birinden tagamly taýýarlanan işdäaçarlara baha bermek emin agzalaryna-da ýeňil düşmedi. Netijede bäsleşikde birinji orna “Owadan ülke” hojalyk jemgyýetiniň mikrobiology Göwher Öwezmyradowa, ikinji orna “Abraýly önüm” hususy kärhanasynyň hünärmeni Amandursyn Öwlýagulyýewa, baýrakly üçünji orna bolsa “Rysgally zähmet” hususy kärhanasynyň hünärmeni Annakeýik Baýramowa mynasyp bolmagy başardylar. Bäsleşikde ýeňiji bolan ýaşlara we oňa gatnaşyjylara Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan taýýarlanan Hormat hatlary, ýadygärlik sowgatlary gowşuryldy.
Umyda KAKAÝEWA,
TMÝG-niň Merkezi Geňeşiniň habarçysy.
