Ýakynda Lebap welaýatynyň Kerki etrabyndaky daşary ýurt dillerini çuňlaşdyryp öwredýän ýöriteleşdirilen 36-njy orta mekdebinde Milli bahar baýramy mynasybetli Kerki etrabynyň orta mekdepleriniň 2-4-nji synp okuwçy gyzlarynyň arasynda “Iň eýjejik gyzjagaz-2020” atly şadyýan bäsleşigiň etrap tapgyry geçirildi. Bäsleşikde okuwçy gyzjagazlar 3 şert boýunça bäsleşip, olarda Hormatly Prezidentimiziň baştutanlygynda bagtyýarlyk döwründe alnyp barylýan tutumly işleri, eziz Watanymyzy, bagtyýar çagalygy, dost-doganlygy, sporty wasp edýän aýdym-sazly çykyşlary ýerine ýetirdiler, milli egin-eşikleri geýip, ony şahyrana sözler bilen wasp etdiler, eminler tarapyndan ýaş aýratynlygyna görä taýýarlanan goşgulary çeper okamakda bäsleşdiler. Bäsleşikde eminler topary tarapyndan gelnen netije boýunça birinji orna Kerki etrabyndaky 24-nji orta mekdebiň 3-nji synp okuwçysy Aýna Taşpolatowa, ikinji orna Kerki etrabyndaky ýöriteleşdirilen 7-nji orta mekdebiň 3-nji synp okuwçysy Oguljan Ahmedowa, üçünji orna Kerki etrabyndaky 2-nji orta mekdebiň 3-nji synp okuwçysy Ogultäç Begliýewa,16-njy orta mekdebiň 4-nji synp okuwçysy Bibijan Jeýhunowa, 28-nji orta mekdebiň 4-nji synp okuwçysy Nurana Galkanowa dagy ýeňiji diýip yglan edildi. Ýeňiji bolan gyzjagazlara bäsleşigi guraýjylar tarapyndan taýýarlanan hormat hat we ýadygärlik sowgatlary dabaraly ýagdaýda gowşuryldy.
A.Rahmanowa – TMÝG-niň Lebap welaýatynyň Kerki etrap Geňeşiniň başlygy.
